“இதுதான் கடைசி எச்சரிக்கை.. உன்ன காலி பண்ணிடுவேன்” போதைப்பொருள் கடத்தல் செய்தியை வெளியிட்ட நிருபர்களுக்கு தவெக நகரச் செயலாளர் கொலை மிரட்டல்..!!!

நாகப்பட்டினத்தில் போதைப்பொருள் கடத்தல் சம்பவத்தில் தமிழக வெற்றிக் கழகத்தின் நிர்வாகி ஒருவர் கைது செய்யப்பட்டார். இந்தச் சம்பவம் குறித்துச் செய்தி வெளியிட்ட பத்திரிகையாளர்கள் மற்றும் செய்தியாளர்களை மிரட்டியதாகக் கூறப்படும் புகாரில், தவெக நகரச் செயலாளர் பாலு மீது காவல்துறை தற்போது அதிகாரப்பூர்வமாக வழக்குப்பதிவு செய்துள்ளது.

செய்தி வெளியிட்ட நிருபர்களை வாட்ஸ்அப் கால் மூலம் தொடர்புகொண்ட நகரச் செயலாளர் பாலு, “இதுதான் உங்களுக்குக் கடைசி எச்சரிக்கை. இனிமேல் இதைப் பற்றி செய்தி வெளியிட்டால் காலி செய்துவிடுவேன்” என்று மிகக் கொடூரமான முறையில் கொலை மிரட்டல் விடுத்துள்ளார். இந்தத் தீவிர மிரட்டல் ஆடியோ மற்றும் தகவல் ஊடகவியலாளர்கள் மத்தியில் பெரும் அதிர்ச்சியை ஏற்படுத்தியது.

இதனைத் தொடர்ந்து, பாதிக்கப்பட்ட செய்தியாளர்களுக்கு ஆதரவாக பத்திரிகையாளர் மன்றம் சார்பில் காவல்துறையிடம் முறைப்படி புகார் அளிக்கப்பட்டது. செய்தியாளர்களின் பாதுகாப்பு மற்றும் சுதந்திரத்தை வலியுறுத்தி அளிக்கப்பட்ட இந்தப் புகாரின் அடிப்படையில், தவெக நிர்வாகி பாலு மீது காவல்துறை உடனடியாக நடவடிக்கை எடுத்து வழக்குப்பதிவு செய்து விசாரணையைத் தீவிரப்படுத்தியுள்ளது.