சார்.. ஒருத்தன் சிக்கிட்டான்…விஷால் என்ன செஞ்சாலும் விஷால் மாதிரியே இருக்கார்…ஆர்யா போட்ட போன்.. விஷாலுக்கு நேர்ந்த கொடூரம்… ‘அவன் இவன்’ சீக்ரெட்…பாலாவிடம் அசிஸ்டெண்ட் டைரக்டர் சொன்ன ‘அந்த’ ஒரு வார்த்தை…!

தமிழ் சினிமாவின் தனித்துவமான மற்றும் தவிர்க்க முடியாத இயக்குநர்களில் ஒருவர் பாலா. சேது, நந்தா, பிதாமகன், நான் கடவுள் என யாரும் யோசிக்க மறுக்கும் கதைக் களங்களைத் தேர்ந்தெடுத்து இயக்கிய பாலா, சமீபகாலமாகப் பெரும் சறுக்கல்களைச் சந்தித்து வருகிறார். கடந்த ஆண்டில் அருண் விஜய் நடிப்பில் வெளியான ‘வணங்கான்’ திரைப்படம் எதிர்பார்த்த வெற்றியைப் பெறவில்லை. அதற்கு முன்பாக விக்ரமின் மகன் துருவ்வை வைத்து அவர் இயக்கிய ‘வர்மா’ திரைப்படம் கைவிடப்பட்டது, சூர்யா ‘வணங்கான்’ படத்திலிருந்து பாதியிலேயே விலகியது எனப் பல சோதனைகள் அவரைத் தொடர்ந்தன. இந்நிலையில், பாலா இயக்கத்தில் விஷால் மற்றும் ஆர்யா இணைந்து நடித்துப் பெரும் வரவேற்பைப் பெற்ற ‘அவன் இவன்’ திரைப்படத்தின் உருவாக்கம் குறித்து ஆர்யா பகிர்ந்துள்ள ஒரு சுவாரசியமான நேர்காணல் தற்போது இணையத்தில் வைரலாகி வருகிறது.

அந்தப் பேட்டியில் ஆர்யா, ‘அவன் இவன்’ படத்தில் விஷால் எப்படி இணைந்தார் என்ற ரகசியத்தை உடைத்துள்ளார். ஒரு பிறந்தநாள் பார்ட்டியில் விஷாலிடம், “மச்சான் பாலா சார் இரண்டு ஹீரோ சப்ஜெக்ட் சொல்லியிருக்கிறார்” என்று ஆர்யா கூற, விஷாலும் உடனே நடிக்கச் சம்மதித்துள்ளார். இதையடுத்து பாலாவுக்கு போன் செய்த ஆர்யா, “சார், ஒருத்தன் சிக்கிட்டான்!” என்று கிண்டலாகக் கூறி விஷாலைப் படத்தில் இணைத்துள்ளார். படப்பிடிப்பின் முதல் நாள் மாலை விஷாலுக்கு போன் செய்து ஆர்யா விசாரித்தபோது, தான் இன்னும் கேரவனிலேயே இருப்பதாக விஷால் கூறியுள்ளார். ஒரு மாதம் கழித்து விஷால் போன் செய்து, “மச்சான், நீ சீக்கிரம் வா.. ஷூட்டிங் முடியப்போகுது” என்று ஆர்யாவை அழைத்துள்ளார். ஆனால், ஆர்யா அங்கு சென்றபோது விஷால் அங்கு இல்லை.

விஷால் எங்கே என்று ஆர்யா கேட்டதற்கு இயக்குநர் பாலா, “விஷால் என்ன செய்தாலும் விஷால் மாதிரியே இருக்கிறார். அதனால் சென்னைக்கு அனுப்பி அவரது கண்கள் மற்றும் பற்களில் கொஞ்சம் மாறுதல் (ஸ்க்விண்ட் ஐ லுக்) செய்யச் சொல்லியிருக்கிறேன்” என்று கூலாகக் கூறியுள்ளார். இதைக் கேட்டு அதிர்ச்சியடைந்த ஆர்யா, “அப்படியென்றால் இதுவரை 45 நாட்கள் எடுத்தது என்ன ஆனது?” என்று கேட்க, பாலா சிரித்து மழுப்பியுள்ளார். சில நாட்கள் கழித்து விஷால் மீண்டும் படப்பிடிப்புக்கு வந்தபோது, இருவரும் அமர்ந்து சாப்பிட்டுக் கொண்டிருந்த வேளையில், அசிஸ்டெண்ட் டைரக்டர் ஒருவர் ஓடிவந்து, “சார், இப்பதான் கதை சிக்கிவிட்டது (முறையான வடிவம் பெற்றுள்ளது)” என்று கூறினாராம். இதைக் கேட்டு அதிர்ந்த விஷால் தன்னைத் திரும்பிப் பார்க்க, நிலைமை சரியில்லை என்று உணர்ந்த ஆர்யா அங்கிருந்து உடனே ஓடிவிட்டதாகச் சிரிப்புடன் நினைவுகூர்ந்துள்ளார்.