ராமதாஸ் கொடுத்த சர்ப்ரைஸ் கிப்ட்… கலக்கத்தில் புதிய நிர்வாகிகள்…. பாமகவுக்குள் அரங்கேறும் அடுத்தகட்ட அரசியல் அதிரடி…!!

பாட்டாளி மக்கள் கட்சியின் நிறுவனரான டாக்டர் ராமதாஸ் மற்றும் அக்கட்சியின் தற்போதைய தலைவர் டாக்டர் அன்புமணி ராமதாஸ் ஆகியோருக்கு இடையே நீண்ட நாட்களாக இருந்து வந்த அரசியல் மற்றும் குடும்ப ரீதியிலான மனஸ்தாபங்கள் தற்போது சுமுகமாக முடிவுக்கு வந்துள்ளன. ராமதாஸின் 61-வது திருமண நாளையொட்டி, அன்புமணி தனது குடும்பத்துடன் நேரில் சென்று தந்தையைச் சந்தித்து நெகிழ்ச்சியுடன் வாழ்த்துப் பெற்றார்.

இந்தச் சந்திப்பைத் தொடர்ந்து, பாமக மற்றும் வன்னியர் சங்கம் உட்பட அதன் 34 துணை அமைப்புகளின் ஒட்டுமொத்தப் பொறுப்புகளையும், முழு அதிகாரத்தையும் அன்புமணியிடம் ராமதாஸ் முறைப்படி ஒப்படைத்துள்ளார். இந்தத் திடீர் சமாதானத்தையும், அதிகாரப் பகிர்வையும் கட்சியின் மூத்த தலைவர் ஜி.கே.மணி உள்ளிட்ட பலரும் வரவேற்றுள்ளனர்.

அதே நேரத்தில், இந்தத் திடீர் அதிகார மாற்றமானது கட்சிக்குள் ஒரு புதிய சலசலப்பையும் ஏற்படுத்தியுள்ளது. இருவருக்கும் இடையே மோதல் நிலவிய காலத்தில் ராமதாஸால் நியமிக்கப்பட்ட புதிய நிர்வாகிகள், தற்போது தங்களது பதவிகளின் எதிர்காலம் குறித்துக் கலக்கத்தில் ஆழ்ந்துள்ளனர்.

எனினும், கட்சியைப் பலப்படுத்தும் நோக்கில், மக்களிடம் செல்வாக்குமிக்க திறமையான நிர்வாகிகளுக்கு அன்புமணி தொடர்ந்து முக்கியத்துவம் அளிப்பார் என்று அரசியல் விமர்சகர்கள் கருதுகின்றனர். இந்த உள்கட்சி அதிகார மாற்றமும், குடும்ப இணக்கமும் வரவிருக்கும் காலங்களில் பாமகவின் தேர்தல் அரசியலிலும், தமிழக அரசியல் களத்திலும் எந்த மாதிரியான புதிய திருப்பங்களை ஏற்படுத்தப் போகிறது என்பதைப் பொறுத்திருந்துதான் பார்க்க வேண்டும்.