“வராது தம்பி..” – தனுஷ் ரசிகர்கள் கேட்ட கேள்விக்கு ஓபனாக ‘நோ’ சொன்ன பிரபல இயக்குநர்… சோஷியல் மீடியாவில் பரபரப்பு…!

தனுஷின் சமீபத்திய திரைப்படங்களில் அவர் இயக்கி நடித்த ‘இட்லி கடை’ மட்டுமே வெற்றியைப் பதிவு செய்தது. இதனையடுத்து, ‘அமரன்’ படத்தின் மூலம் பெரும் வெற்றியைக் கொடுத்த இயக்குநர் ராஜ்குமார் பெரியசாமி இயக்கத்தில் ‘ஓம்’ என்ற திரைப்படத்தில் தனுஷ் தற்போது தீவிரமாக நடித்து வருகிறார். மம்மூட்டி, சாய் பல்லவி போன்ற முன்னணி நட்சத்திரங்கள் முக்கிய வேடங்களில் நடிக்க, சாய் அபயங்கர் இசையமைக்கிறார். பெரும் நட்சத்திரப் பட்டாளத்தோடு உருவாகி வரும் இந்தப் படம் வருகின்ற அக்டோபர் 16-ஆம் தேதி திரைக்கு வரவிருக்கிறது.

இந்தப் படத்தைத் தொடர்ந்து, ‘லப்பர் பந்து’ புகழ் இயக்குநர் தமிழரசன் பச்சமுத்து இயக்கத்தில் தனது 56-வது படத்தில் தனுஷ் நடிக்கவுள்ளார். வருகின்ற ஜூலை 28-ஆம் தேதி தனுஷின் பிறந்தநாளன்று இந்தப் படத்தின் புதிய அப்டேட் ஏதேனும் வருமா என ரசிகர் ஒருவர் எக்ஸ் தளத்தில் கேட்டிருந்தார். இதற்குப் பதிலளித்த இயக்குநர், D55 படம் வெளியான பிறகே D56 குறித்த முக்கிய அறிவிப்புகள் வரும் என்றும், பிறந்தநாளன்று வேண்டுமானால் ஆடை வடிவமைப்பாளர் யார் என்ற சாதாரண தகவலை மட்டுமே தனது தரப்பில் கூற முடியும் என்றும் நகைச்சுவையாகக் குறிப்பிட்டுள்ளார்.

இதற்கு அடுத்தபடியாகவும் தனுஷின் திரைப்பயணத்தில் பல வலுவான கூட்டணிகள் காத்திருக்கின்றன. தமிழரசனின் படத்தை முடித்த பிறகு, இயக்குநர் மாரி செல்வராஜுடன் ஒரு புதிய படத்தில் அவர் இணையவுள்ளார். அதைவிடச் சிறப்பாக, கவிஞர் அறிவுமதி எழுதிய ‘தமிழ் முருகன்’ நாவலை அடிப்படையாகக் கொண்டு வெற்றிமாறன் இயக்கும் புதிய படத்திலும் தனுஷ் நடிக்கவிருப்பதாக சமீபத்தில் அறிவிக்கப்பட்டுள்ளது. தனுஷ் – வெற்றிமாறன் கூட்டணி எப்போதுமே மாபெரும் வெற்றிகளைப் பதிவு செய்திருப்பதால், இந்தப் படத்தின் மீதான எதிர்பார்ப்பும் ரசிகர்களிடையே பல மடங்கு அதிகரித்துள்ளது.