“மீண்டு வருவேன்..! மார்பக புற்றுநோயுடன் போராடும் நடிகை உமா சங்கரி… கலங்க வைக்கும் உருக்கமான பதிவு..!!”

தமிழ் சினிமாவின் மூத்த நடிகையான சுமித்ராவின் மூத்த மகளும், பிரபல நடிகையுமான உமா சங்கரி மார்பகப் புற்றுநோயால் பாதிக்கப்பட்டுள்ளார். இயக்குனர் சீமான் இயக்கிய ‘வீரநடை’ படத்தின் மூலம் தமிழ் திரையுலகிற்கு அறிமுகமான இவர், கே. பாக்யராஜ் இயக்கத்தில் வெளியான ‘சொக்கத் தங்கம்’ திரைப்படத்தில் நடிகர் விஜயகாந்தின் தங்கையாக நடித்து ரசிகர்கள் மத்தியில் மிகவும் பிரபலமானார். இது தவிர ‘கடல் பூக்கள்’, ‘தென்றல்’, ‘கோவை பிரதர்ஸ்’ மற்றும் மலையாளம், கன்னட மொழிப் படங்களிலும் இவர் நடித்துள்ளார்.

கடந்த 2006-ம் ஆண்டு துஷ்யந்த் என்பவரைத் திருமணம் செய்து கொண்ட உமா சங்கரி, அதன் பிறகு திரைப்பட வாழ்க்கையிலிருந்து விலகி குடும்ப வாழ்க்கையில் கவனம் செலுத்தி வந்தார். இந்த நிலையில், இவருக்கு மார்பகப் புற்றுநோய் பாதிப்பு இருப்பது கண்டறியப்பட்டுள்ளது. இதற்காக அவர் தற்போது மருத்துவமனையில் அனுமதிக்கப்பட்டு, தீவிர சிகிச்சையின் ஒரு பகுதியாக இரண்டாவது கட்ட கீமோதெரபி மற்றும் இம்யூனோதெரபி சிகிச்சைகளைப் பெற்று வருகிறார்.

https://www.instagram.com/p/Dax22Nkzzk3/?utm_source=ig_web_button_share_sheet

தன்னுடைய இந்த நோய் பாதிப்பு குறித்து நடிகை உமா சங்கரி தனது இன்ஸ்டாகிராம் பக்கத்தில் உருக்கமான மற்றும் நம்பிக்கையூட்டும் பதிவு ஒன்றை வெளியிட்டுள்ளார். அதில், கடந்த சில நாட்கள் தனக்கு மிகவும் சவாலானதாக இருந்ததாகவும், இருப்பினும் இந்த இக்கட்டான போராட்டத்தை முழு நம்பிக்கையுடனும் மன உறுதியுடனும் தான் எதிர்கொண்டு வருவதாகவும் குறிப்பிட்டுள்ளார். மேலும், தனக்கு ஆதரவளிக்கும் அனைவருக்கும் நன்றி தெரிவித்துள்ள அவர், விரைவில் முழுமையாகக் குணமடைந்து இயல்பு வாழ்க்கைக்குத் திரும்புவேன் என்றும் நம்பிக்கை தெரிவித்துள்ளார். இவருடைய இந்த பதிவு தற்போது இணையத்தில் வைரலாகி வருகிறது.