“உலக சாதனை படைக்கணும்…” டைரியில் எழுதிய விடுமுறை இலக்கு… தூண்டிலில் மாட்டிய ராட்சத மீனால் நிஜமான சிறுமியின் கனவு..!!

அமெரிக்காவின் அரிசோனா மாநிலத்தைச் சேர்ந்த மேடிலின் டேவிஸ் என்ற ஏழாம் வகுப்பு மாணவி, தனது பள்ளி கோடை விடுமுறை இலக்குகளின் பட்டியலில் உலக சாதனை படைக்க வேண்டும் என்று எழுதியிருந்தார். ஆறாம் வகுப்பில் அவரது ஆசிரியர் கோடை விடுமுறையில் செய்ய வேண்டிய இலக்குகளை எழுதச் சொன்னபோது, மற்ற மாணவர்கள் புத்தகம் படிப்பது, புதிய விளையாட்டு கற்றுக்கொள்வது போன்ற எளிய விஷயங்களை எழுதிய வேளையில், மேடிலின் “கேபிபாரா என்ற விலங்கைத் தொட்டுப் பார்ப்பது” மற்றும் “ஒரு உலக சாதனை படைப்பது” என இரு விசித்திரமான இலக்குகளை எழுதினார். அவரது தாய் ஆட்ரி டேவிஸ் இதைப்பார்த்து ஆச்சரியமடைந்தாலும், மேடிலின் விரைவில் ஒரு நண்பரின் பிறந்தநாள் விழாவில் விலங்குகள் பூங்காவிற்குச் சென்று கேபிபாராவைத் தொட்டுத் தடவி தனது முதல் இலக்கை முடித்தார்.

அதன்பின்னர், ஜூலை 4-ஆம் தேதி விடுமுறையின் போது தனது தந்தை டைலன் டேவிஸுடன் விஸ்கான்சின் பகுதிக்கு ‘மஸ்கி’ என்ற ராட்சத மீனைப் பிடிக்கச் சென்றபோது மேடிலினுக்கு உலக சாதனை படைக்கும் வாய்ப்பு கிடைத்தது. அவர்கள் தங்களது மீன்பிடிப் பயணத்தை முடித்துக் கொண்டு திரும்பவிருந்த நேரத்தில், மேடிலினின் மீன்பிடி தூண்டில் கயிற்றில் மிகப்பெரிய இழுவை ஏற்பட்டது. மீனின் கடுமையான எடையால் அவரது மீன்பிடி தடி பாதியாக வளையும் அளவுக்குச் சென்றது. தந்தையின் உதவியுடன் கடும் போராட்டத்திற்குப் பிறகு அந்த மீனை நீரிலிருந்து வெளியே எடுத்தபோது, அது ஒரு மிகப்பெரிய ராட்சத மஸ்கி மீன் என்பது தெரியவந்தது.

அந்த ராட்சத மீனைப் பிடித்த பிறகு, அதன் எடை மற்றும் நீளம் முறையாக அளவிடப்பட்டு அதிகாரப்பூர்வ ஆவணங்கள் சமர்ப்பிக்கப்பட்டன. பல மாத ஆய்வுகளுக்குப் பிறகு, மேடிலின் பிடித்த அந்த மீன் சிறுவர்களுக்கான பிரிவில் ‘ஜூனியர் மஸ்கி-லென்த் வேர்ல்ட் ரெக்கார்ட்’ உலக சாதனையாக அதிகாரப்பூர்வமாக அங்கீகரிக்கப்பட்டது. விடுமுறை முடியும் முன்பே தனது இரு கடினமான இலக்குகளையும் அடைந்து சாதனை படைத்த மேடிலினின் இந்த சாதனை, இலக்கு எவ்வளவு பெரியதாகவோ அல்லது விசித்திரமாகவோ இருந்தாலும், உறுதியோடு முயன்றால் அதை நிச்சயம் அடைய முடியும் என்பதை உலகிற்கு உணர்த்துகிறது.