“இந்தியாவுக்காகத்தான் இந்த முடிவா..?” டிரம்ப் எடுத்த முடிவுக்கு பின்னால் இருக்கும் உண்மையான காரணம் இதுதான்.. போட்டு உடைத்த வெளியுறவு அமைச்சர்..!!

ரஷ்ய எண்ணெய் இறக்குமதிக்கு 100% வரை கூடுதல் சுங்க வரி மற்றும் பிற கடுமையான தடைகள் விதிக்கும் சட்டப் பிரிவுகளுக்கு அமெரிக்க அதிபர் டொனால்ட் டிரம்ப் தற்காலிக வரிவிலக்கு அளித்து உத்தரவிட்டுள்ளார். இந்த அதிரடி முடிவு குறித்து அமெரிக்க வெளியுறவு அமைச்சர் மார்க் ரூபியோ விளக்கம் அளித்துள்ளார். ரஷ்யா மற்றும் ஈரான் மீதான புதிய சட்டத்தின் கீழ், ரஷ்யாவிடம் இருந்து அதிக அளவில் எண்ணெய் வாங்கும் நாடுகள் மீது இந்தத் தடைகளை விதித்தால், அது உலகளாவிய எரிசக்தி சந்தையிலும் அமெரிக்கப் பொருளாதாரத்திலும் எந்த மாதிரியான தாக்கத்தை ஏற்படுத்தும் என்பதை மதிப்பிடவே அதிபர் டிரம்ப் இந்த 60 நாள் தடைநீக்க கால அவகாசத்தை அறிவித்துள்ளார் என்று அவர் குறிப்பிட்டார்.

மேலும், அமெரிக்காவின் மிக முக்கிய கூட்டாளியான இந்தியா, தனது கச்சா எண்ணெய் தேவைகளுக்கான ஆதாரங்களைப் பல வழிகளில் பல்வகைப்படுத்தி வந்தபோதிலும், இன்னும் கணிசமான அளவு ரஷ்ய எரிசக்தியையே நம்பியிருக்கிறது என்பதை மார்க் ரூபியோ சுட்டிக்காட்டினார். இத்தகைய சூழ்நிலையில், ரஷ்யாவிடமிருந்து எண்ணெய் வாங்குவதை இந்தியா போன்ற நாடுகளால் ஒரே நாளில் அல்லது மிகக் குறுகிய காலத்தில் மாற்றிவிட முடியாது என்பதை அதிபர் டிரம்ப் உணர்ந்துள்ளார் என்றும் அவர் தெரிவித்தார். மத்திய கிழக்கு நாடுகளில் நிலவும் போர்ச் சூழலால் ஏற்கனவே உலகச் சந்தையில் கச்சா எண்ணெய் விலை அதிகரித்துள்ள நிலையில், இந்த 60 நாள் மறுஆய்வு காலம் உலகப் பொருளாதாரச் சமநிலையைப் பாதுகாக்க உதவும் என்றும் அவர் விளக்கமளித்தார்.