LATEST NEWS
சாமி சிலை கரைக்கும்போது இப்படியா நடக்கணும்.? சிலைக்கு அடியில் மாட்டி நீரில் மூழ்கிய 5 நண்பர்கள்.. 2 பேர் பரிதாப பலி..!!
மத்தியப் பிரதேச மாநிலம் பன்னா மாவட்டத்தில் உள்ள தேவேந்திர நகரில், துர்க்கை சிலை விசர்ஜனத்தின் போது அணை நீரில் மூழ்கி இரண்டு இளைஞர்கள் பரிதாபமாக உயிரிழந்தனர். இந்தத் துயரச் சம்பவத்தில் ஐந்து நண்பர்கள் ஒன்றாகத் தண்ணீரில் மூழ்கிய நிலையில், மூன்று பேர் உள்ளூர் மக்களால் பத்திரமாக மீட்கப்பட்டுள்ளனர்.
உயிரிழந்தவர்கள் 18 வயதுடைய ஆயுஷ் அகர்வால் மற்றும் 25 வயதுடைய கிருஷ்ணா சோனி என அடையாளம் காணப்பட்டுள்ளனர். சிலை விசர்ஜனத்தின் போது எதிர்பாராதவிதமாக இவர்கள் தண்ணீருக்குள் இருந்த துர்க்கை சிலையின் அடியில் சிக்கிக்கொண்டதால், மூச்சுத்திணறி பரிதாபமாக உயிரிழந்ததாக நேரில் பார்த்தவர்கள் தெரிவித்துள்ளனர். தண்ணீரில் மூழ்கிய மற்ற மூன்று நண்பர்களான சாஹில் திவாரி, ஹரியோம் திவேதி மற்றும் கரண் சோனி ஆகியோர் மீட்கப்பட்டு, சிகிச்சைக்காக பன்னா மாவட்ட அரசு மருத்துவமனைக்கு அனுப்பி வைக்கப்பட்டனர்.
இச்சம்பவம் குறித்துத் தகவல் அறிந்ததும் பன்னா மாவட்டக் காவல் கண்காணிப்பாளர் நிவேதிதா நாயுடு மற்றும் வட்டாட்சியர் சுமித் திவாரி ஆகியோர் சம்பவ இடத்திற்கு விரைந்து வந்து நிலைமையைக் கட்டுப்படுத்தினர். எனினும், விசர்ஜனம் நடைபெற்ற இடத்தில் முன்னெச்சரிக்கையாகப் போதிய பாதுகாப்பு ஏற்பாடுகளோ அல்லது நீச்சல் வீரர்களோ நிறுத்தப்படவில்லை எனக் கூறி உள்ளூர் மக்கள் அதிகாரிகளிடம் தங்களது கடுமையான எதிர்ப்பையும் ஆத்திரத்தையும் வெளிப்படுத்தினர்.
