பகீர்… இரவு முழுக்க எரிந்த உடல்… வாளியில் எலும்புகள்..! 70 வயது மூதாட்டிக்கு நேர்ந்த கொடூரம்..! பின்னணியில் வெளிவந்த திடுக்கிடும் உண்மை..!!

ராஜஸ்தான் மாநிலம் பில்வாராவில் 70 வயது மூதாட்டி படுகொலை செய்யப்பட்டு, 22 லட்சம் ரூபாய் மதிப்பிலான நகைகள் கொள்ளையடிக்கப்பட்ட சம்பவம் பெரும் அதிர்ச்சியை ஏற்படுத்தியுள்ளது. குற்றவாளிகள் முதலில் மூதாட்டியின் கழுத்தை நெரித்துக் கொன்றுவிட்டு, உடலை பெட்ரோல் ஊற்றி எரித்துள்ளனர். இரவு முழுவதும் எரிந்த அந்தச் சடலத்தை, மறுநாள் காலை தண்ணீர் ஊற்றி அணைத்து, எலும்புகள் மற்றும் சாம்பலை ஒரு வாளியில் சேகரித்து கோத்தாரி நதியில் வீசியுள்ளனர். விசாரணையில், மூதாட்டியின் கணவரிடம் பணியாற்றிய முக்கிய நபர் சொத்துத் தராத ஆத்திரத்தில் இந்த கொலையைச் செய்திருப்பது தெரியவந்துள்ளது.

இந்தச் சம்பவம் பில்வாராவின் வீர் சாவர்க்கர் சௌக் பகுதியில் நடந்துள்ளது. 70 வயதான கம்லா தேவி காங்கரியா கொல்லப்பட்ட வழக்கில், 43 வயதான ரவி தபடியா மற்றும் அவரது கூட்டாளி ஹீரா சிந்தி ஆகிய இருவரை காவல்துறையினர் கைது செய்து நீதிமன்றத்தில் ஆஜர்படுத்தினர். நீதிமன்றம் அவர்களை மூன்று நாள் காவலில் வைத்து விசாரிக்க உத்தரவிட்டுள்ளது. உயிரிழந்த கம்லா தேவியின் கணவர் தேஜ் சிங்குடன் ரவிக்கு பழக்கம் இருந்ததுடன், அவரிடம் பணம் கடன் வாங்கியிருந்ததும் தெரியவந்துள்ளது. தேஜ் சிங்கின் மறைவுக்குப் பிறகு, கம்லா தேவி தனக்குச் சொத்தில் பங்கு தருவதாகக் கூறியிருந்ததாகவும், ஆனால் சொத்துகளை தன் பேரனுக்கு எழுதி வைத்துவிட்டதாகவும் கூறப்படுகிறது; இதனால் ஏற்பட்ட ஆத்திரத்திலேயே ரவி இந்தத் திட்டத்தைச் செயல்படுத்தியுள்ளான்.

கடந்த அக்டோபர் 12-ம் தேதி மாலை, உழக்கைத் திருப்பிக் கொடுப்பதாகக் கூறி கம்லா தேவியை தனது வீட்டிற்கு வரவழைத்த ரவி, அவரை ஆக்டிவாவில் அழைத்துச் சென்று தனது வீட்டில் வைத்து கொலை செய்துள்ளான். பின்னர் கூட்டாளியுடன் சேர்ந்து சடலத்தை எரித்து சாம்பலை ஆற்றில் வீசியதுடன், மூதாட்டி அணிந்திருந்த சுமார் 15 சவரன் தங்கம் மற்றும் நகைகளையும் கொள்ளையடித்துச் சென்றுள்ளனர். இதற்கிடையில், கொலை நடந்த அந்த வீட்டின் உண்மையான உரிமையாளரான மனிஷ் என்பவரும் கடந்த 8 ஆண்டுகளாகக் காணாமல் போயிருப்பதாகப் பக்கத்து வீட்டினர் பகீர் தகவலைத் தெரிவித்துள்ளனர்.