“எங்களையே ஓவர்டேக் பண்றியா..?” பைக்கில் துரத்தி வந்து பஸ் டிரைவரை வெளுத்த வாலிபர்கள்! வெளியான பகீர் வீடியோ..!!

புனே-நாசிக் நெடுஞ்சாலையில் சக்கான் அருகே மகாராஷ்டிரா மாநிலப் போக்குவரத்துக் கழகத்திற்கு சொந்தமான அரசுப் பேருந்து ஒன்றை இரண்டு நபர்கள் பின்தொடர்ந்து வந்து வழிமறித்து நிறுத்தியுள்ளனர். நாசிக் நோக்கிச் சென்று கொண்டிருந்த அந்தப் பேருந்து தங்களை முந்திச் சென்றதால் ஆத்திரமடைந்த அந்த இருவரும், தனித்தனி இருசக்கர வாகனங்களில் பேருந்தைத் துரத்திச் சென்று இந்தச் செயலில் ஈடுபட்டுள்ளனர். இந்தச் சம்பவம் சக்கான் தெற்கு காவல் நிலைய எல்லைக்குட்பட்ட பகுதியில் அரங்கேறியுள்ளது.

போலீசாரின் விசாரணையின்படி, நெடுஞ்சாலையில் பேருந்தை வழிமறித்து நிறுத்திய அந்த இரு வாலிபர்களும் ஓட்டுநரைத் தாக்கியதுடன், வாகனத்தின் கட்டுப்பாட்டைத் தங்கள் கையில் எடுக்க முயன்றுள்ளனர். மேலும், பேருந்துக்குள் இருந்த பயணிகளையும் அவர்கள் கடுமையாக அச்சுறுத்தியுள்ளனர். தீபாவளிப் பண்டிகையை முன்னிட்டு சொந்த ஊர்களுக்குச் சென்று கொண்டிருந்த பயணிகள் பலர் இதனால் கடும் பீதியடைந்தனர். அந்த நபர்களிடம் பயணிகள் எவ்வளவோ கெஞ்சியும் அவர்கள் எதையும் கேட்கவில்லை.

இதனைத் தொடர்ந்து, பயணிகள் வேறு மாற்றுப் போக்குவரத்தை ஏற்பாடு செய்து தங்கள் பயணத்தைத் தொடர்ந்தனர். இந்த மோதலின் போது எடுக்கப்பட்ட வீடியோ சமூக வலைதளங்களில் பரவியதை அடுத்து இச்சம்பவம் வெளிச்சத்திற்கு வந்தது. இதுகுறித்து சக்கான் தெற்கு காவல் நிலைய மூத்த ஆய்வாளர் சஞ்சய் சாலுங்கே கூறுகையில், சம்பந்தப்பட்ட நபர்கள் அடையாளம் காணப்பட்டு காவலில் எடுக்கப்பட்டுள்ளதாகவும், விரைவில் அவர்கள் மீது வழக்குப்பதிவு செய்து உரிய நடவடிக்கை எடுக்கப்படும் என்றும் தெரிவித்தார்.