CRIME
பகீர்.. இன்ஸ்டாகிராம் தோழியை நம்பி வீட்டில் தங்க வைத்த பெண்ணுக்குக் காத்திருந்த பேரிடி.. பல லட்சம் வைர நகைகளுடன் மாயமான மர்மப் பெண்.. அதிர்ச்சி பின்னணி..!!
இன்ஸ்டாகிராம் மூலம் அறிமுகமாகி, உடல்நலக்குறைவு எனக் கூறி வீட்டிலேயே தங்கி நம்பிக்கையைப் பெற்று, இறுதியில் பல லட்சம் மதிப்புள்ள தங்கம் மற்றும் வைர நகைகளைத் திருடிக்கொண்டு பெண் ஒருவர் மாயமான சம்பவம் விசாகப்பட்டினத்தில் பெரும் பரபரப்பை ஏற்படுத்தியுள்ளது. அக்கய்யபாலம் 4-வது டவுன் காவல் நிலைய எல்லைக்குட்பட்ட பகுதியில் வசித்து வரும் மனேஹள்ளி நீரஜா என்பவருக்கு இன்ஸ்டாகிராம் வழியாக அந்தப் பெண் அறிமுகமாகியுள்ளார். பழக்கத்தை ஏற்படுத்திக்கொண்ட அப்பெண், தனக்கு உடல்நிலை சரியில்லை என்று காரணம் கூறி நீரஜாவின் வீட்டிற்கு வந்து பல நாட்களாக அங்கேயே தங்கியுள்ளார்; வீட்டினரின் முழு நம்பிக்கையையும் பெற்ற அவர், படுக்கையறையில் வைக்கப்பட்டிருந்த 11.3 கிராம் எடையுள்ள வைர நெக்லஸ், பிற வைர நகைகள் மற்றும் தங்க ஆபரணங்களை யாருக்கும் சந்தேகம் வராத வகையில் திருடிக்கொண்டு அங்கிருந்து தப்பியோடியுள்ளார்.
தனது நகைகள் மாயமானதைக் கண்டு அதிர்ச்சியடைந்த பாதிக்கப்பட்ட பெண் மனேஹள்ளி நீரஜா, இது குறித்து அக்கய்யபாலம் காவல் நிலையத்தில் புகார் அளித்துள்ளார். சமூக வலைத்தள நட்பைப் பயன்படுத்தி வீட்டிற்குள்ளேயே ஊடுருவி நூதன முறையில் கைவரிசை காட்டிய அந்தப் பெண்ணைப் பிடிக்க காவல்துறையினர் தீவிர விசாரணையில் இறங்கியுள்ளனர். இன்ஸ்டாகிராம் கணக்கு விவரங்கள் மற்றும் அப்பகுதியில் உள்ள சிசிடிவி காட்சிகளை அடிப்படையாகக் கொண்டு, தப்பியோடிய அந்த மர்மப் பெண்ணை போலீசார் தீவிரமாகத் தேடி வருகின்றனர்.
