LATEST NEWS
திமுக-வுக்குப் புது அதிர்ச்சி.. கட்சியிலிருந்து விலகித் தமிழக வெற்றிக் கழகத்தில் இணைந்த காங்கேயம் நகராட்சித் தலைவர்.. திருப்பூர் அரசியலில் வெடித்த பரபரப்பு..!!
திருப்பூர் மாவட்டம் காங்கேயம் நகராட்சித் தலைவர் சூர்யா பிரகாஷ் திமுகவில் இருந்து விலகித் தமிழக வெற்றிக் கழகத்தில் இணைந்துள்ளது தமிழக அரசியல் களத்தில் பெரும் பரபரப்பை ஏற்படுத்தியுள்ளது. கடந்த 2022-ஆம் ஆண்டு நடைபெற்ற நகர்ப்புற உள்ளாட்சித் தேர்தலில் காங்கேயம் நகராட்சியின் 1-வது வார்டில் போட்டியிட்டு வெற்றி பெற்ற சூர்யா பிரகாஷ், அதனைத் தொடர்ந்து காங்கேயம் நகராட்சித் தலைவராகத் தேர்ந்தெடுக்கப்பட்டுப் பணியாற்றி வந்தார். இந்நிலையில், திமுகவில் இருந்து விலகிய அவர் தற்போது தவெகவில் தன்னை இணைத்துக் கொண்டுள்ளார்.
தமிழகத்தில் உள்ளாட்சித் தேர்தல் நடைபெற உள்ள சூழலில், பிரதான கட்சிகளான திமுக மற்றும் அதிமுகவில் இருந்து முக்கிய நிர்வாகிகள் மற்றும் மக்கள் பிரதிநிதிகள் அடுத்தடுத்து தவெகவில் இணைந்து வருவது அரசியல் அரங்கில் அதிக கவனம் பெற்றுள்ளது. குறிப்பாக, ஆளுங்கட்சியாக இருந்த திமுகவைச் சேர்ந்த ஒரு நகராட்சித் தலைவரே பதவியுடன் கட்சியை விட்டு விலகித் தவெக பக்கம் சென்றிருப்பது அக்கட்சி வட்டாரத்தில் சலசலப்பை ஏற்படுத்தியுள்ளது.
காங்கேயம் நகராட்சித் தலைவரின் இந்த இணைப்பு, திருப்பூர் மாவட்டத்தில் தமிழக வெற்றிக் கழகத்தின் கட்டமைப்பை மேலும் வலுப்படுத்தும் என அக்கட்சியினர் தெரிவித்துள்ளனர். வரும் உள்ளாட்சித் தேர்தலை முன்னிட்டு, இன்னும் பல முக்கிய உள்ளாட்சிப் பிரதிநிதிகள் தவெகவில் இணைய வாய்ப்புள்ளதாக அரசியல் வட்டாரத்தில் பேசப்படுகிறது.
