நீங்க மேட் இன் சைனாவா..? இந்திய உணவகத்தில் சிங்கப்பூர் சுற்றுலாப் பயணியிடம்… முதியவர் கேட்ட கேள்வி..! வைரலாகும் வீடியோ..!!

இந்தியாவில் உள்ள ஓர் உணவகத்தில் உணவருந்திக் கொண்டிருந்த சிங்கப்பூர் சுற்றுலாப் பயணியிடம், அருகில் தேனீர் அருந்திக் கொண்டிருந்த முதியவர் ஒருவர், “ஆப் மேட் இன் சைனா?” என்று கேட்ட சம்பவம் இணையத்தில் வைரலாகி வருகிறது. மொழி மற்றும் தொடர்பாடல் இடைவெளியால் அந்த முதியவர் அவ்வாறு கேட்ட கேள்வி, பலரின் கவனத்தை ஈர்த்துள்ளது.

அந்த முதியவரின் கேள்வியைக் கேட்டு எந்தவிதக் கோபமோ அதிர்ச்சியோ அடையாத அந்தச் சிங்கப்பூர் பயணி, “இல்லை, சிங்கப்பூர்” என்று மிகவும் இயல்பாகவும் அமைதியாகவும் பதிலளித்துவிட்டுத் தொடர்ந்து சாப்பிடத் தொடங்கினார். பின்னர் இந்த காணொலியைத் தனது இன்ஸ்டாகிராம் பக்கத்தில் பகிர்ந்த அவர், “எப்படியும் எல்லாமே சீனாவில் தான் தயாரிக்கப்படுகிறது” என்ற நகைச்சுவையான குறிப்பையும் பதிவிட்டிருந்தார்.

இந்த வீடியோ சமூக வலைத்தளங்களில் பரவியதைத் தொடர்ந்து, ஆயிரக்கணக்கான பயனர்கள் இதைப் பார்த்து ரசித்து கருத்து தெரிவித்து வருகின்றனர். அந்த முதியவர் தவறான எண்ணத்தில் கேட்கவில்லை என்றும், ‘நீங்கள் எந்த நாட்டிலிருந்து வந்திருக்கிறீர்கள்?’ என்பதைத் தான் மொழி தெரியாததால் அவ்வாறு கேட்டுள்ளார் என்றும் இணையவாசிகள் சுட்டிக்காட்டியுள்ளனர். மொழிகளைத் தாண்டிய எளிய மனித தொடர்பாடலுக்கு இந்த நிகழ்வு ஒரு சிறந்த உதாரணம் எனப் பலரும் பாராட்டி வருகின்றனர்.