“வாஷிங் மிஷினுக்குள் போட்டு…” பெற்ற பிள்ளைகளையே கொல்வது போல் ரீல்ஸ்… ‘டிக் டாக்’கில் வெடித்த கொடூர சைக்கோ ட்ரெண்ட்… கதறும் இணையவாசிகள்..!!

அமெரிக்காவில், பிரசவத்திற்குப் பிந்தைய மனக்கோளாறு காரணமாகத் தனது மூன்று குழந்தைகளைக் கொன்றதாகக் குற்றம் சாட்டப்பட்ட முன்னாள் மகப்பேறு செவிலியர் லின்சே க்ளான்சி மீதான வழக்கு விசாரணை நீதிமன்றத்தில் நடைபெற்று வருகிறது. இந்தச் சம்பவத்தைப் பின்னணியாகக் கொண்டு, டிக்டாக் போன்ற சமூக வலைத்தளங்களில் சில பெண்கள் தங்கள் குழந்தைகளை வாஷிங் மிஷினுக்குள் போடுவது போலவும் படிகளில் இருந்து கீழே தள்ளிவிடுவது போலவும் நடித்து வீடியோக்களை வெளியிட்டு ஒரு பயங்கரமான ட்ரெண்டை உருவாக்கியுள்ளனர். கவனத்தையும் லைக்குகளையும் ஈர்ப்பதற்காகக் கைக்குழந்தைகளை வைத்துத் தாய்மார்களே இத்தகைய கொடூரமான செயல்களில் ஈடுபடுவது அருவருப்பானது என்றும், இது நகைச்சுவை அல்ல, நோயியல் சார்ந்த மனநிலை என்றும் இணையவாசிகள் கடும் கண்டனங்களைப் பதிவிட்டு வருகின்றனர்.

சமூக ஊடகங்களில் கிளான்சி வழக்கு ஏற்கனவே பல்வேறு விவாதங்களை உருவாக்கியுள்ளது. அவருக்கு ஆதரவாக டி-ஷர்ட்டுகள் தயாரிப்பது, “எனக்கும் அப்படித்தான், லிண்ட்சே” என்ற தலைப்பில் தாய்மையின் சுமையைப் பகிர்ந்து வீடியோக்கள் வெளியிடுவது எனப் பல போக்குகள் எழுந்தன. ஆனால், மூன்று குழந்தைகளின் மரணத்தைச் சிறுமைப்படுத்தும் வகையில் உருவாக்கப்படும் இத்தகைய உள்ளடக்கங்கள், மனநல இரக்கத்திற்கும் குற்றத்தைச் சாதாரணமாக்குவதற்கும் இடையிலான வேறுபாட்டை மங்கச் செய்வதாக விமர்சகர்கள் சாடுகின்றனர். சமூக வலைத்தளங்களில் கவன ஈர்ப்புக்காகச் சொந்தக் குழந்தைகளையே இழிவுபடுத்தும் இத்தகைய வீடியோக்களை உடனடியாகத் தடை செய்ய வேண்டும் என்ற கோரிக்கையும் வலுத்து வருகிறது.

நீதிமன்றத்தில் நடைபெற்று வரும் இந்த வழக்கில், கிளான்சி மனநோயால் பாதிக்கப்பட்டிருந்தார் என எதிர் தரப்பும், அவர் திட்டமிட்டே இக்குற்றத்தைச் செய்தார் என அரசுத் தரப்பும் வாதிடுகின்றன. நான்கு நாட்கள் கலந்தாலோசனைக்குப் பிறகும் நடுவர் குழுவால் ஒருமித்த முடிவை எட்ட முடியாததால், விவாதங்கள் தொடர்ந்து நடைபெற்று வருகின்றன. இக்குற்றச்சாட்டு நிரூபிக்கப்பட்டால் பரோல் இல்லாத ஆயுள் தண்டனையோ அல்லது மனநலக் காரணங்களால் விடுவிக்கப்பட்டால் மருத்துவமனைச் சிகிச்சையோ அவருக்கு அளிக்கப்படலாம். கடுமையான மனநோயால் பாதிக்கப்படும் பிரதிவாதிகளை நீதி அமைப்பு எவ்வாறு கையாள வேண்டும் என்பதையும், தாய்மார்களின் மனநல முக்கியத்துவத்தையும் இந்த வழக்கு தீவிர விவாதத்திற்கு உள்ளாக்கியுள்ளது.