பல் டாக்டருக்கு அப்பாவாக புரொமோஷன் கொடுத்த ஸ்ருதி ஹாசன்…உலக நாயகன் மகளின் மாஸ்டர் பிளான்…! ‘பூஜா ராமச்சந்திரன்’ யார் தெரியுமா…!ஸ்ருதி ஹாசன் பகிர்ந்த நெகிழ்ச்சியான பிளாஷ்பேக்…!

உலக நாயகன் கமல் ஹாசனின் மகளாகப் பிறந்தாலே பிறக்கும்போதே செலிபிரிட்டி அந்தஸ்து தானாகவே தேடி வந்துவிடும். ஆனால், ஒட்டுமொத்த உலகமே கமலின் நடிப்பைக் கொண்டாடிக்கொண்டிருந்த வேளையில், அவரது மூத்த மகள் ஸ்ருதி ஹாசன் மட்டும், “நான் கமல் ஹாசனின் மகளே இல்லை” என்று கூறி சிறுவயதில் பொய் சொல்லித் திரிந்துள்ளார். இன்று நடிகை, பாடகி, இசையமைப்பாளர் எனப் பன்முகத் திறமைகளுடன் கோலிவுட் முதல் பாலிவுட் வரை ஆல்-ரவுண்டராகத் தனக்கென ஒரு முத்திரை பதித்திருக்கும் ஸ்ருதி ஹாசன், தனது சிறுவயது ரகசியம் மற்றும் அடையாளம் குறித்துப் பகிர்ந்துள்ள சுவாரசியமான விஷயங்கள் தற்போது இணையத்தில் வைரலாகி வருகின்றன.

சின்ன வயதில் சென்னையில் எங்குப் பார்த்தாலும் அப்பா கமல் ஹாசனின் போஸ்டர்களும், அவரது புகழும் நிறைந்திருந்ததால், ஸ்ருதிக்குத் தனக்கென ஒரு தனி அடையாளம் இல்லாமல் போனது ஒரு பெரிய பாரமாகத் தோன்றியுள்ளது. பள்ளி போன்ற பொது இடங்களுக்குச் செல்லும்போது, “ஏய் பாரு, இது கமல் ஹாசன் பொண்ணுல?” என்று எல்லாரும் கைகாட்டிப் பேசுவது அவருக்கு மிகுந்த சங்கடத்தைத் தந்துள்ளது. “எனக்கும் ஒரு பெயர் இருக்கு, நான் ஸ்ருதி” என்று உலகிற்கு உரக்கச் சொல்ல ஆசைப்பட்ட அவர், அப்பாவின் நிழலிலிருந்து தப்பிக்க ஒரு மாஸ்டர் பிளான் போட்டுள்ளார். யாராவது அவரிடம் வந்து, “நீ கமல் ஹாசன் மகளா?” என்று கேட்டால், “ஐயையோ இல்லவே இல்லை, என் பேரு பூஜா ராமச்சந்திரன்; என் அப்பா ஒரு டாக்டர்” என்று மிக தைரியமாகப் பொய் சொல்வாராம்.

இதில் சுவாரசியமான ட்விஸ்ட் என்னவென்றால், அந்த ராமச்சந்திரன் வேறு யாருமல்ல; ஸ்ருதிக்கு பல் சிகிச்சை அளித்த டென்டிஸ்ட் (Dentist) ஆவார். தனக்கு உலக நாயகனின் மகளுக்கு அப்பாவாகும் ‘புரொமோஷன்’ கிடைத்த விஷயமே அந்தப் பாவம் டாக்டருக்குத் தெரிந்திருக்க வாய்ப்பில்லை. சென்னையில் அப்பாவின் புகழால் தனக்குச் சுதந்திரம் பறிபோனதாக உணர்ந்த ஸ்ருதி, பெற்றோர் பிரிந்த காலகட்டத்தில் மும்பைக்குக் குடிபெயர்ந்தார். அங்குச் சென்றால் தன்னை யாரும் கமல் ஹாசனின் மகள் என்று அடிக்கடி அடையாளப்படுத்திக் கேள்வி கேட்க மாட்டார்கள், சுதந்திரமாகத் தனது தனித்துவத்தை வளர்த்துக் கொள்ளலாம் என்ற எண்ணமே அவரை மும்பைக்குப் பயணிக்க வைத்துள்ளது.

அன்று அப்பாவின் பெயரைக் கூற வெட்கப்பட்டு, அதிலிருந்து தப்பிக்க ‘பூஜா ராமச்சந்திரன்’ என்று பொய் சொல்லி ஓடி ஒளிந்த ஸ்ருதி, இன்று வளர்ந்து பக்குவப்பட்ட பிறகு முற்றிலும் மாறியுள்ளார். “இப்போது கமல் ஹாசன் என்கிற பெயர் இல்லாத ஒரு ஸ்ருதியை என்னால் கற்பனை செய்து கூடப் பார்க்க முடியாது” என்று கூறி, தன் தந்தை மீதுள்ள அளவுகடந்த அன்பையும் மரியாதையையும் வெளிப்படுத்தியுள்ளார். கமல் ஹாசன் – சாரிகா தம்பதியின் பிடிவாத குணமும், உழைப்பும் அப்படியே ஸ்ருதிக்கும் வந்திருப்பதால்தான், அப்பாவின் பின்னணியை எங்குமே பயன்படுத்தாமல், இன்று இந்திய சினிமாவே பெருமைப்படும் ஒரு சுயம்புவாக ஸ்ருதி ஹாசன் உயர்ந்து நிற்கிறார்.