“பயப்படாதீங்க… நான் இருக்கேன்..! ஸ்கூட்டியில் சிக்கிய பெண்ணை மீட்ட இளைஞரின் நெகிழ்ச்சி செயல்..! 10 லட்சம் பேரின் இதயங்களை வென்ற பைக் பயணி..!!”

சத்தீஸ்கர் மாநிலம் பிலாஸ்பூரில் பெய்த கனமழை காரணமாகப் பல பகுதிகள் வெள்ளத்தில் மூழ்கி, மக்களின் இயல்பு வாழ்க்கை பாதிக்கப்பட்டது. இந்தச் சூழலில், வெள்ளநீர் தேங்கிய சாலையில் பெண் ஒருவர் தனது ஸ்கூட்டியுடன் தவித்துக் கொண்டிருந்தபோது, அவ்வழியாக வந்த பைக் ஓட்டி ஒருவர் அவருக்கு உடனடியாக ஓடிவந்து உதவிய சம்பவம் இணையவாசிகளின் இதயங்களை வென்றுள்ளது.

சௌரப் பார்கவ் என்ற இன்ஸ்டாகிராம் வீடியோ உருவாக்குநர் தனது பைக்கில் சென்று கொண்டிருந்தபோது, சாலையில் பெண் ஒருவர் ஸ்கூட்டியுடன் நகர முடியாமல் நிற்பதைக் கண்டார். ஸ்கூட்டி பழுதாகிவிட்டதோ என்று நினைத்து அருகில் சென்று பார்த்தபோது, அப்பெண்ணின் கால் ஸ்கூட்டியின் ஒரு பகுதியில் சிக்கிக்கொண்டதால் அவரால் இறங்கவோ அல்லது வாகனத்தை நகர்த்தவோ முடியாமல் அவதியுற்றது தெரியவந்தது. உடனே சௌரப் தனது பைக்கை ஓரமாக நிறுத்தி, அப்பெண்ணை அமைதிப்படுத்தி, கவனமாக அவரது காலைச் சிக்கலிலிருந்து மீட்டார். பின்னர், அவருக்குக் காயம் எதுவும் இல்லை என்பதை உறுதிசெய்து ஸ்கூட்டியையும் பாதுகாப்பாகச் சாலையோரம் நகர்த்தி உதவினார்.

https://www.instagram.com/reel/Da4iFTLtaoW/?utm_source=ig_web_button_share_sheet

இந்த நெகிழ்ச்சியான நிகழ்வை வீடியோவாகத் தனது இன்ஸ்டாகிராம் பக்கத்தில் பகிர்ந்த சௌரப், “சாலையில் யாராவது கஷ்டப்படுவதைக் கண்டால் உங்களால் முடிந்த சிறிய உதவியையாவது செய்யுங்கள்; அது அவர்களுக்குப் பெரிய நிம்மதியைத் தரும்” என்று மனிதநேயத்துடன் பதிவிட்டார். இந்த வீடியோ இணையத்தில் 10 லட்சத்திற்கும் அதிகமான பார்வைகளைப் பெற்று, பலரின் பாராட்டுகளைப் பெற்று வருகிறது.