“ஐயோ நெஞ்சே நடுங்குதுப்பா..!” கொஞ்சம் காலடி பிசகினாலும் அவ்வளவுதான்…! 20 அடி உயரத்தில் உயிரைக் கையில் பிடித்துக்கொண்டு பள்ளிக்குச் செல்லும் குழந்தைகள்..! கொதித்தெழும் கிராம மக்கள்..!!

சத்தீஸ்கர் மாநிலம் கரியாபந்த் மாவட்டத்தில் உள்ள பழங்குடியினர் மேம்பாட்டு வட்டாரமான மேன்பூர் பகுதியில், பள்ளி குழந்தைகள் கல்வி கற்பதற்காக தினமும் தங்களின் உயிரைப் பணயம் வைத்து வருகின்றனர். மேன்பூர் தாலுகா தலைமையகத்திலிருந்து வெறும் 5 கிலோமீட்டர் தொலைவில் உள்ள தேஹார்குடா மற்றும் காம்பாடா கிராம பஞ்சாயத்துகளுக்கு இடையே பாயும் பைரி ஆற்றின் மீது இந்த அவலநிலை நிலவுகிறது. இங்குள்ள பள்ளிச் சிறுவர்கள் தினமும் பள்ளிக்குச் செல்லவும் திரும்பவும் 20 அடி உயர தூணில் பொருத்தப்பட்டுள்ள குறுகிய இரும்பு ஏணியில் ஏறி இறங்க வேண்டிய கட்டாயத்தில் உள்ளனர். காலடி சற்று பிசகினாலும் பெரும் அசம்பாவிதம் அல்லது உயிருக்கு ஆபத்து ஏற்படும் சூழல் நிலவுகிறது. தினமும் காலையில் கனமான புத்தகப் பையை முதுகில் சுமந்துகொண்டு குழந்தைகள் பயத்துடன் இந்த ஏணியைக் கடக்கும்போது, கரையில் நிற்கும் பெற்றோர்களும் கிராமமக்களும் பெரும் அச்சத்துடன் அவர்களைப் பார்த்துக் கொண்டிருக்கின்றனர்.

இந்த அரைகுறை பாலத்தைக் கடப்பதற்கு ஒப்பந்ததாரரோ, அரசோ அல்லது உள்ளூர் நிர்வாகமோ எவ்வித பாதுகாப்பான மாற்று ஏற்பாட்டையும் செய்யவில்லை. இரும்பு கம்பிகளால் தற்காலிகமாக அமைக்கப்பட்ட குறுகிய ஏணி மட்டுமே குழந்தைகளுக்கு ஒரே ஆதரவாக உள்ளது. மழைக்காலத்தில் ஏணியில் லேசான வழுக்கல் ஏற்படும்போது நிலைமை மேலும் பயங்கரமாக மாறுகிறது. குழந்தைகள் பாதுகாப்பாக வீடு திரும்புவார்களா என்ற கவலையிலேயே பெற்றோர்களின் பொழுது கழிகிறது. இக்கட்டான இச்சிக்கல் குறித்து கிராமமக்கள் பலமுறை புகாரளித்தும் நிர்வாகம் விழித்துக் கொள்ளவில்லை என்றும், ஏதேனும் பெரிய விபத்து நடக்கும் வரை காத்திருக்கிறதா என்றும் அவர்கள் வேதனையுடன் கேள்வி எழுப்புகின்றனர்.

பைரி ஆற்றின் மீது சுமார் 300 மீட்டர் நீளமுள்ள இந்த பிரம்மாண்ட பாலத்தின் கட்டுமானப் பணி கடந்த 5-6 ஆண்டுகளாக மிக மெதுவான வேகத்தில் நடைபெற்று வருகிறது. கடந்த ஆண்டு கிராமமக்களின் புகாரைத் தொடர்ந்து, உள்ளூர் சட்டமன்ற உறுப்பினர் ஜனக் துருவ் மற்றும் அப்போதைய மாவட்ட ஆட்சியர் பகவான் சிங் உய்கே ஆகியோர் ஆய்வு மேற்கொண்டு, ஒப்பந்ததாரர் மற்றும் அதிகாரிகளைக் கடுமையாக எச்சரித்தனர். மழைக்காலத்திற்கு முன்பாக 6 மாதங்களுக்குள் வேலையை முடிப்பதாக ஒப்பந்ததாரர் உறுதியளித்த போதிலும், எந்த மாற்றமும் ஏற்படவில்லை. இதன் விளைவாக குழந்தைகள் இன்னும் உயிரைப் பணயம் வைத்து பள்ளிக்குச் செல்ல நேரிடுகிறது. மேலும் பாலத்தின் மேல் கூர்மையான இரும்பு கம்பிகள் வெளியே நீட்டிக்கொண்டிருப்பதால், குழந்தைகள் மற்றும் கிராமமக்கள் அடிக்கடி காயமடைந்து வருகின்றனர்.