“எனக்கு எதுவும் வேணாம்… அப்பாவை திருப்பித் தாங்க…” 5-ஆம் வகுப்புத் தேர்வில் சிறுமி எழுதிய அந்த ஒற்றை வரி..! கண்ணீர் விட்ட ஆசிரியர்கள்.. நெஞ்சை நெகிழ வைக்கும் சம்பவம்..!!

தெலுங்கானா மாநிலம் ரங்காரெட்டி மாவட்டத்தின் ஷாபாத் மண்டலத்திலுள்ள மச்சன்பள்ளி தொடக்கப் பள்ளியில் ஐந்தாம் வகுப்புத் தேர்வுகள் சமீபத்தில் நடைபெற்றன. இதில் தெலுங்கு பாடப் பரிசோதனையில், “நரசிம்ம சுவாமி உங்கள் முன் தோன்றி ஏதாவது கேட்டால், நீங்கள் என்ன கேட்பீர்கள்?” என்று ஒரு கேள்வி கேட்கப்பட்டிருந்தது. இதற்கு மாணவர்கள் தங்கள் விருப்பங்களை எழுதிய நிலையில், அந்தச் சிறுமி “எனக்கு என் தந்தை மீண்டும் வேண்டும்” என்று பதிலளித்திருந்தார். இதைப் பார்த்த ஆசிரியர்கள் பெரும் அதிர்ச்சியும் சோகமும் அடைந்தனர்.

விசாரணையில், அச்சிறுமியின் தந்தை இரண்டு ஆண்டுகளுக்கு முன்பே இறந்துவிட்டது தெரியவந்தது. தந்தையை இழந்து இரண்டு ஆண்டுகள் கடந்த போதிலும், அவரது நினைவுகளும் அந்த இழப்பின் வலியும் அச்சிறுமியின் மனதை விட்டு இன்னும் அகலவில்லை. பணம், விளையாட்டுப் பொருட்கள், புதிய ஆடைகள் என எதையும் விரும்பாத அந்தப் பிஞ்சு உள்ளம், இறைவனிடம் வரம் கேட்கும் வாய்ப்பு கிடைத்தால் பிரிந்து சென்ற தனது தந்தையே மீண்டும் தன்னிடம் வரவேண்டும் என்று தன் ஆழ்மனதின் ஏக்கத்தை வெளிப்படுத்தியுள்ளது.

இந்த உருக்கமான பதிலைப் படித்த விடைத்தாளைத் திருத்திய ஆசிரியர் உட்படப் பள்ளியின் அனைத்து ஆசிரியர்களும் கண்ணீர் விட்டனர். சொற்களால் விவரிக்க முடியாத அந்தப் பிஞ்சு குழந்தையின் துயரத்தைக் கண்டு உருகிய ஆசிரியர்கள், அச்சிறுமியைக் கட்டியணைத்து ஆறுதல் கூறினர். அந்த விடைத்தாளில் எழுதப்பட்ட பதில், வெறும் வார்த்தை அல்ல; அது தந்தைக்காகக் காத்திருக்கும் ஒரு மகளின் ஏக்கம் நிறைந்த கூக்குரல் என்பதை உணர்ந்து அனைவரும் சோகத்தில் மூழ்கினர்.