“யார் சொன்னது ஆர்சிபியால் முடியாது என்று…”விராட் கோலியின் வெறித்தனமான கம்பேக்…பல வருட கிண்டல்…ஓடிவந்து அணைத்த அனுஷ்கா…கொண்டாட்டத்தில் மூழ்கிய அகமதாபாத்.!

உலக கிரிக்கெட் ரசிகர்களின் பெரும் வரவேற்பைப் பெற்ற ஐபிஎல் தொடரின் 19-வது சீசன் கடந்த மார்ச் மாதம் தொடங்கி, நேற்று அகமதாபாத்தில் நடைபெற்ற விறுவிறுப்பான இறுதிப்போட்டியுடன் நிறைவடைந்தது. இந்த மெகா பைனலில் ராயல் சேலஞ்சர்ஸ் பெங்களூரு (RCB) அணியும், குஜராத் டைட்டன்ஸ் அணியும் பலப்பரீட்சை நடத்தின. இதில் டாஸ் வென்று முதலில் பந்துவீசிய பெங்களூரு அணி, குஜராத்தை 155 ரன்களுக்குள் சுருட்டியது. பின்னர் களமிறங்கிய ஆர்சிபி அணி, நட்சத்திர வீரர் விராட் கோலியின் பொறுப்பான ஆட்டத்தால் 5 விக்கெட்டுகளை மட்டுமே இழந்து இலக்கை எட்டி அபார வெற்றி பெற்றது. இதன் மூலம் குஜராத் அணியை வீழ்த்திய பெங்களூரு அணி, தொடர்ச்சியாக இரண்டாவது முறையாக ஐபிஎல் கோப்பையைக் கைப்பற்றி வரலாற்று சாதனை படைத்துள்ளது.

கடந்த 2024ஆம் ஆண்டு வரை ஒருமுறை கூட கோப்பை வெல்ல முடியாமல் தவித்து வந்த பெங்களூரு அணியும், குறிப்பாக விராட் கோலியும் சமூக வலைதளங்களில் கடுமையான கிண்டல்களுக்கு உள்ளாகினர். ஆனால், கடந்த சீசனில் முதன்முறையாக கோப்பையை வென்று அந்த சாபத்தை உடைத்த ஆர்சிபி, இந்த சீசனிலும் சாம்பியன் பட்டத்தைத் தக்கவைத்து தங்களது ஆதிக்கத்தை நிலைநிறுத்தியுள்ளது. இந்த அடுத்தடுத்த வரலாற்று வெற்றிகளால் உணர்ச்சிவசப்பட்ட விராட் கோலி மைதானத்திலேயே மிகவும் எமோஷனலாக காணப்பட்டார். பல வருட ஏளனங்களுக்குப் பிறகு கிடைத்துள்ள இந்த இரட்டிப்பு மகிழ்ச்சி ஒட்டுமொத்த பெங்களூரு ரசிகர்களையும் நெகிழச் செய்துள்ளது.

இதற்கிடையே, போட்டி முடிந்த பிறகு மைதானத்தில் இருந்த விராட் கோலியை, அவரது மனைவியும் நடிகையுமான அனுஷ்கா ஷர்மா தூரத்திலிருந்து பார்த்தவுடன், மகிழ்ச்சியில் கத்திக்கொண்டே ஓடிச் சென்று அவரை இறுக்கமாகக் கட்டியணைத்துக் கொண்டார். கோலி எமோஷனலாக இருந்த அந்த நெகிழ்ச்சியான தருணத்தில், அனுஷ்கா அவரை தழுவி தேற்றி இயல்பு நிலைக்குக் கொண்டு வந்தார். கடந்த 2017-ல் திருமணமான இந்த நட்சத்திர தம்பதியின் அன்பை வெளிப்படுத்தும் இந்த அழகான வீடியோ, தற்போது சமூக வலைதளங்களில் வெளியாகி ரசிகர்களால் ‘சூப்பர் ஜோடி’ எனப் பாராட்டப்பட்டு பயங்கரமாக ட்ரெண்டாகி வருகிறது.