அதிமுகவில் நள்ளிரவு பூகம்பம்..! சி.வி.சண்முகம் ஆதரவாளர்கள் 100-க்கும் மேற்பட்டோர் கூண்டோடு நீக்கம்… அதிரடி ஆக்ஷன் எடுத்த எடப்பாடி..!!

விழுப்புரம் மாவட்ட அதிமுகவில் பெரும் பரபரப்பை ஏற்படுத்தும் வகையில், கட்சியின் பொதுச்செயலாளர் எடப்பாடி கே. பழனிசாமி, முன்னாள் அமைச்சர் சி.வி. சண்முகத்தின் ஆதரவாளர்கள் 100-க்கும் மேற்பட்டோரை கட்சியின் அடிப்படை உறுப்பினர் உள்ளிட்ட அனைத்துப் பொறுப்புகளில் இருந்தும் அதிரடியாக நீக்கியுள்ளார். மயிலம் உள்ளிட்ட பல்வேறு பகுதிகளைச் சேர்ந்த ஒன்றியம், பேரூர் மற்றும் கிளைக் கழக அளவிலான முக்கிய நிர்வாகிகள் மீது இந்த ஒழுங்கு நடவடிக்கை பாய்ந்துள்ளது. கட்சியின் கட்டுப்பாட்டை மீறி, அதற்கு அவப்பெயர் ஏற்படுத்தும் வகையில் செயல்பட்டதாகக் கூறி இந்த அதிரடி முடிவை அதிமுக தலைமை எடுத்துள்ளது.

இந்த நீக்க நடவடிக்கைக்கு முன்னதாக, அதிமுகவின் முக்கிய நிர்வாகியான முன்னாள் அமைச்சர் அக்ரி கிருஷ்ணமூர்த்தி, சி.வி. சண்முகத்தின் கருத்துக்களைக் கேட்டறியக் கட்சித் தலைமை தயாராக இருப்பதாகக் கூறி ஒரு சமரசப் பேச்சுவார்த்தைக்கான சூழலை உருவாக்கியிருந்தார். ஆனால், அவர் பேசிய சில மணி நேரங்களிலேயே சி.வி. சண்முகத்தின் தீவிர ஆதரவாளர்கள் கூண்டோடு கட்சியை விட்டு நீக்கப்பட்ட அதிகாரப்பூர்வ உத்தரவு வெளியானது. இந்த அடுத்தடுத்த நகர்வுகள் தமிழக அரசியல் வட்டாரத்தில் பெரும் வியப்பையும் விவாதத்தையும் ஏற்படுத்தியுள்ளன.

தலைமையின் இந்த அதிரடி உத்தரவின் மூலம், விழுப்புரம் மாவட்ட அதிமுகவில் நீண்ட நாட்களாகப் புகைந்து கொண்டிருந்த உட்கட்சி மோதல் தற்போது வெளிப்படையாக வெடித்து, உச்சக்கட்டத்தை எட்டியுள்ளது என்பது தெளிவாகியுள்ளது. சமரசப் பேச்சுவார்த்தை என்ற பேச்சுக்கே இடமில்லாமல், ஒழுங்கீன நடவடிக்கைகளுக்கு எதிராகத் தலைமை எடுத்த இந்த அதிரடி முடிவு, சி.வி. சண்முகத்தின் தரப்பிற்குப் பின்னடைவாகப் பார்க்கப்படுவதோடு, மாவட்ட அளவில் கட்சியின் எதிர்கால அரசியல் நகர்வுகளில் பெரும் தாக்கத்தை ஏற்படுத்தும் என எதிர்பார்க்கப்படுகிறது.