மெத்தையில் செத்த பூச்சிகள்… கதற வைத்த கொசுக்கள்..! இந்தியாவின் டாப் ஐஐடி விடுதி நிலையைக் கண்டு அதிர்ந்து… ஜப்பான் மாணவி பகிர்ந்த பகீர் அனுபவம்..!!

ஜப்பானைச் சேர்ந்த ஹீரோ என்ற மாணவி, ஐஐடி ஹைதராபாத்தில் சேரும் முதல் ஜப்பானிய மாணவி என்ற பெருமையுடன் இந்தியா வந்தடைந்தார். தனது புதிய கல்விப் பயணத்தின் உற்சாகத்தையும், இங்கு வந்தடைந்த சில நாட்களிலேயே சந்தித்த எதிர்பாராத சவால்களையும் அவர் இன்ஸ்டாகிராம் காணொலி மூலம் பகிர்ந்துள்ளார். விமானத் தாமதத்திற்குப் பிறகு கல்லூரி வளாகத்தை அடைந்த அவருக்கு, பன்னாட்டு உறவுகள் மையம் மூலமாக உற்சாக வரவேற்பு அளிக்கப்பட்டது. ஆரம்பத்தில் அனைத்தும் நன்றாகத் தெரிந்தாலும், விடுதி அறைக்குச் சென்ற பிறகு அவரது அனுபவம் முற்றிலும் மாறுபட்டதாக இருந்தது.

விடுதி அறையில் தங்கிய முதல் இரவிலேயே அவர் பல்வேறு பராமரிப்புச் சிக்கல்களைச் சந்திக்க நேரிட்டது. முறையான மெத்தைக்குப் பதிலாக வெறும் “மரப் பலகை”, உடைந்த அலமாரி, பழுதடைந்த திரைச்சீலை கம்பி மற்றும் சரிவரப் பூட்ட முடியாத கதவு ஆகியவற்றால் அவர் அவதிப்பட்டார். இதைத் தொடர்ந்து, மெத்தையில் செத்த பூச்சிகள் இருந்ததையும், கொசுக்கடியால் அவதிப்பட்டதையும் குறிப்பிட்ட அவர், விடுதியின் சுகாதாரமின்மையால் கடுமையான ஒவ்வாமைக்கு ஆளானார். இந்த உடல்நலக் குறைவு தீவிரமடைந்ததால், இந்தியாவில் தனது முதல் மருத்துவமனை விஜயத்தை மேற்கொள்ள வேண்டிய கட்டாயத்திற்குத் தள்ளப்பட்டார்.

https://www.instagram.com/reel/DbdgTaPPVOB/?utm_source=ig_web_button_share_sheet

இந்தக் காணொலி சமூக வலைதளங்களில் வேகமாகப் பரவி, பெரும் கவனத்தைப் பெற்றுள்ளது. நாட்டின் முன்னணி உயர்கல்வி நிறுவனத்தின் விடுதிப் பராமரிப்பு இப்படி இருப்பது குறித்து இணையவாசிகள் பலர் தங்களது கவலையையும் அதிருப்தியையும் வெளிப்படுத்தியுள்ளனர். அதேவேளையில், புதிய காலநிலைக்கு மாறுவது சவாலானது எனக் குறிப்பிட்டு, அவர் விரைவில் குணமடைய பிரார்த்திப்பதாகவும், அவருக்குத் தேவையான ஆதரவை கல்லூரி நிர்வாகம் வழங்கும் என்றும் கூறிப் பலரும் தங்கள் ஆறுதலையும் ஆதரவையும் தெரிவித்து வருகின்றனர்.