தவெகவில் இணையும் நடிகை கஸ்தூரி..? வதந்திகளுக்கு சாட்டையடி பதில் கொடுத்து பா.ஜ.க பாசத்தை வெளிப்படுத்திய நடிகை கஸ்தூரி..!!

பொதுநிகழ்ச்சி ஒன்றில் தமிழக அமைச்சர் மற்றும் தமிழக வெற்றிக் கழக சட்டமன்ற உறுப்பினரைச் சந்தித்ததால், தான் தவெக கட்சியில் இணையப் போவதாக சமூக வலைத்தளங்களில் பரவி வரும் வதந்திகளுக்கு நடிகை கஸ்தூரி திட்டவட்டமாக மறுப்பு தெரிவித்துள்ளார். பொதுவெளியில் நாகரிகமான முறையில் தற்செயலாக நடைபெற்ற ஒரு சந்திப்பைக் கீழ்த்தரமான முறையில் வக்கிரமாகச் சித்தரித்து சிலர் வதந்திகளைப் பரப்புவதாக அவர் தனது எக்ஸ் சமூக வலைத்தளப் பக்கத்தில் கடுமையாகச் சாடியுள்ளார்.

அரசியல் நிலைப்பாடு குறித்துத் தெளிவுபடுத்திய அவர், நாட்டின் பிரதமர் நரேந்திர மோடியின் சிறப்பான பணிகளாலும், கொள்கைகளாலும் ஈர்க்கப்பட்டு மட்டுமே தான் அரசியலுக்கு வந்ததாகக் குறிப்பிட்டுள்ளார். தனக்குத் தமிழக பாரதிய ஜனதா கட்சியின் தலைமை மட்டுமே எப்போதும் வழிகாட்டியாக இருக்கும் என்பதைத் திட்டவட்டமாகத் தெரிவித்துள்ள அவர், மாற்று அரசியல் சிந்தனைகளுக்கு இங்கு இடமில்லை என்பதையும் மறைமுகமாக உணர்த்தியுள்ளார்.

மேலும், அரசியல் ஆதாயங்களுக்காகவும், விளம்பரத்திற்காகவும் தன் மீது பரப்பப்படும் இதுபோன்ற கீழ்த்தரமான அவதூறுகளுக்கும் வதந்திகளுக்கும் தான் எப்போதும் அஞ்சப்போவதில்லை என்றும் நடிகை கஸ்தூரி தனது பதிவில் மிகவும் ஆவேசமாக விளக்கியுள்ளார். இந்த விவகாரம் தற்பொழுது தமிழக அரசியல் வட்டாரங்களிலும், சமூக வலைத்தளங்களிலும் பெரும் விவாதப் பொருளாக மாறியுள்ளது.