“பிறந்தபோதே தூக்கி எறிஞ்சிடுங்க’ன்னு சொன்னாங்..!” இரு கைகளும் இல்லை.. கால்களால் எழுதி ஆசிரியர் கனவோடு போராடும் 13 வயது லட்சுமி… நெகிழ வைக்கும் வைரல் வீடியோ..!!

பீகாரின் கடிஹார் மாவட்டம் ஹசன்கஞ்ச் ஒன்றியத்தில் உள்ள பாதௌரியா நடுநிலைப் பள்ளியில் 4-ஆம் வகுப்பு படிக்கும் மாணவி லக்ஷ்மி, தன்னம்பிக்கைக்கு ஒரு சிறந்த எடுத்துக்காட்டாகத் திகழ்கிறார். பிறப்பிலேயே இரு கைகளும் இல்லாத நிலையில் பிறந்த இந்தச் சிறுமி, தனது குறைபாட்டை ஒரு தடங்கலாக எண்ணாமல் கால்களாலேயே பென்சிலைப் பிடித்து எழுதிப் படித்து வருகிறார். தினமும் தவறாமல் பள்ளிக்குச் செல்லும் லக்ஷ்மியின் இந்த லட்சிய வெறியைக் கண்டு பள்ளி ஆசிரியர்களும் மற்ற மாணவர்களும் வியந்து, அவருக்குத் தேவையான அனைத்து உதவிகளையும் அன்போடு செய்து வருகின்றனர்.

அன்றாட வாழ்வில் பல சவால்களை எதிர்கொண்ட போதிலும், லக்ஷ்மிக்கு எதிர்காலத்தில் படித்து ஒரு சிறந்த ஆசிரியையாக மாற வேண்டும் என்பதே மிகப்பெரிய கனவாக உள்ளது. தான் படித்துப் பட்டம் பெற்று, மற்ற குழந்தைகளுக்குப் பாடம் சொல்லிக் கொடுக்க வேண்டும் என்ற எண்ணத்துடன் அவர் ஊக்கத்துடன் பயின்று வருகிறார். லக்ஷ்மியின் தந்தை ராம்தேவ் யாதவ் கூலி வேலை செய்து வர, தாய் ரேணு தேவி குடும்பத்தைக் கவனித்து வருகிறார். வறுமை நிறைந்த சூழ்நிலையிலும், மகள் பிறந்த போது சிலர் கூறிய தவறான அறிவுரைகளைப் புறந்தள்ளி, பெற்றோர் அவரை அன்புடனும் ஆதரவுடனும் பள்ளிக்கு அனுப்பிப் படிக்க வைத்து வருகின்றனர்.

https://www.instagram.com/reel/Db–jTGtfN9/?utm_source=ig_web_button_share_sheet

குடும்பத்தின் பொருளாதாரச் சூழல் மிகவும் சுமாராக இருப்பதால், மாற்றுத்திறனாளி மாணவர்களுக்கான அரசின் நலத்திட்ட உதவிகளும் கல்வி உதவித்தொகையும் லக்ஷ்மிக்குக் கிடைத்தால் அவரது எதிர்காலப் படிப்பு மேலும் சிறப்பாக அமையும் எனப் பெற்றோர் எதிர்பார்க்கின்றனர். உடல் குறைபாடோ அல்லது வறுமையோ சாதனைகளுக்குத் தடையல்ல என்பதையும், பெண் பிள்ளைகளின் கல்வியை எக்காரணத்தைக் கொண்டும் கைவிடக் கூடாது என்பதையும் நிரூபித்துக் காட்டியுள்ள லக்ஷ்மி, இன்று பலருக்கும் ஒரு மிகப்பெரிய முன்னுதாரணமாகவும் நம்பிக்கையின் வடிவமாகவும் விளங்குகிறார்.