காப்பாத்துங்க… அலறல் சத்தத்தில் அதிர்ந்த ஊர்… சொந்தத் தாயையும் மாமியாரையும் வெட்டிச் சாய்த்த போதை ஆசாமி… மயிரிழையில் உயிர் தப்பிய தந்தை, மனைவி..! பாட்னாவில் நடந்த நெஞ்சை நடுங்க வைக்கும் கொடூரம்..!!!

பீகார் தலைநகர் பாட்னா அருகே உள்ள கோபால்பூர் காவல் எல்லைக்குட்பட்ட சோனா கோபால்பூர் கிராமத்தில், குடும்பத் தகராறு காரணமாக போதைக்கு அடிமையான இளைஞர் ஒருவர் தனது தாய் மற்றும் மாமியாரை கொடூரமாகத் தாக்கியுள்ளார். வியாழக்கிழமை அன்று நடந்த இந்தச் சம்பவத்தில், குற்றம் சாட்டப்பட்ட ராஜ்பால் மஹதோ என்பவரின் தாக்குதலால் இரு பெண்களின் தலை மற்றும் உடலில் பலத்த காயங்கள் ஏற்பட்டு ரத்த வெள்ளத்தில் சரிந்தனர். பெண்களின் அலறல் சத்தத்தைக் கேட்டு ஓடிவந்த அயலாரும் கிராம மக்களும் உடனடியாக இருவரையும் மீட்டு நலாந்தா மருத்துவக் கல்லூரி மருத்துவமனைக்கு கொண்டு சென்றனர். அங்கு முதலுதவி அளிக்கப்பட்ட பிறகு, அவர்களின் நிலைமை கவலைக்கிடமாக இருந்ததால் மேல் சிகிச்சைக்காக பாட்னா மருத்துவக் கல்லூரி மருத்துவமனைக்கு மாற்றப்பட்டனர்.

பெண்களைத் தாக்கிய பின்னர், அந்த இளைஞர் தனது 4 வயது சிறுமி மகளைப் பிணைக்கைதியாகப் பிடித்துக்கொண்டு வீட்டிற்குள் உள்ள ஒரு அறையில் பூட்டிக் கொண்டார். இச்சம்பவம் குறித்துத் தகவல் அறிந்த கோபால்பூர் காவல் நிலையப் போலிஸார் உடனடியாகச் சம்பவ இடத்திற்கு வந்து வீட்டைச் சுற்றி வளைத்தனர். பெரும் போராட்டத்திற்குப் பிறகு, போலிஸார் அறையிலிருந்த சிறுமியைப் பத்திரமாக மீட்டதோடு, தாக்குதல் நடத்திய இளைஞரையும் கைது செய்தனர். குற்றவாளியான ராஜ்பால் மஹதோ போதைக்கு அடிமையானவர் என்றும், தாக்குதல் நடந்த சமயத்திலும் அவர் போதையில் இருந்ததாகவும், தாய் மற்றும் மாமியாரைத் தாக்கிய பிறகு தனது தந்தை பத்ரி மஹதோ மற்றும் மனைவியையும் தாக்க முயன்றதாகவும், அவர்கள் தப்பித்து உயிர்பிழைத்ததாகவும் அவரது தந்தை தெரிவித்துள்ளார்.

இச்சம்பவம் குறித்து சதர்-2 உதவிப் போலிஸ் கண்காணிப்பாளர் ரஞ்சன் குமார் கூறுகையில், ஆரம்பகட்ட விசாரணையில் குடும்பத் தகராறு மற்றும் போதைப் பழக்கமே இந்த வன்முறைக்குக் காரணம் எனத் தெரியவந்துள்ளதாகக் குறிப்பிட்டுள்ளார். தாக்குதலுக்குப் பயன்படுத்தப்பட்ட ஆயுதத்தைக் கைப்பற்றுவது உட்பட அனைத்துக் கோணங்களிலும் போலிஸார் விசாரணை நடத்தி வருகின்றனர். தற்போது கைது செய்யப்பட்ட இளைஞர் போலிஸ் காவலில் வைக்கப்பட்டுள்ளார், காயமடைந்த இரு பெண்களுக்கும் மருத்துவமனையில் தொடர்ந்து தீவிர சிகிச்சை அளிக்கப்பட்டு வருகிறது. போலிஸார் இது தொடர்பாக அடுத்த கட்ட சட்டப்பூர்வ நடவடிக்கைகளை மேற்கொண்டு வருகின்றனர்.