“என்னப்பா சொல்றீங்க.. இன்ஜினியர்களுக்கு கூட இவ்ளோ சம்பளம் கிடைக்காதா..?!” மாசம் ரூ.35,000 அசால்ட்டா சேமிக்கும் டீக்கடைக்காரர்..! வைரல் வீடியோ..!!

சாலையோர தேநீர் விற்பனையாளர்களின் வருமானம் குறைவாகவே இருக்கும் என்று பலர் நினைப்பது உண்டு. ஆனால், மும்பையைச் சேர்ந்த ஒரு தேநீர் வியாபாரியின் வீடியோ இணையத்தில் வெளியாகி, மக்களின் இந்த எண்ணத்தை மாற்றியமைத்து பெரும் விவாதத்தைக் கிளப்பியுள்ளது. ‘Two_generations_one_vlog’ என்ற இன்ஸ்டாகிராம் பக்கத்தில் பகிரப்பட்ட அந்த வீடியோவில், தேநீர் தெர்மோஸ் வைத்துள்ள நபரிடம் ஒரு நாளில் எவ்வளவு ரூபாய் தேநீர் விற்பனையாகிறது என்று கேட்கப்படுகிறது. அதற்கு அவர், தினமும் சுமார் ரூ.2,500 முதல் ரூ.3,000 வரை தேநீர் விற்பனை ஆவதாகக் கூறுகிறார்.

தினசரி விற்பனையில் செலவுகள் போக எவ்வளவு மிஞ்சும் என்று கேட்டபோது, அனைத்துச் செலவுகளும் போக நாளொன்றுக்குக் குறைந்தபட்சம் ரூ.1,500 வரை லாபம் கிடைக்கும் என்று அவர் தெரிவிக்கிறார். தெருக்களில் சுற்றித் திரிந்து தேநீர் விற்பது மட்டுமின்றி, அவருக்குச் சொந்தமாக ஒரு கடையும் உள்ளது. அதற்காக அவர் மாதம் ரூ.5,000 வாடகை செலுத்துகிறார். மாத வருமானம் குறித்துக் கேட்டபோது, அனைத்துச் செலவுகளையும் கழித்த பிறகு மாதம் ரூ.30,000 முதல் ரூ.35,000 வரை சேமிக்க முடிகிறது என்றும், ஆரம்பக்கட்டத்தில் பல பொறியாளர்களுக்குக் கூட இந்த அளவுக்கு வருமானம் கிடைப்பதில்லை என்றும் அவர் கூறுகிறார். மேலும், அவரிடம் வேலை அதிகமாக இருப்பதால், உதவுவதற்கு மற்றொரு நபர் தேவைப்படுவதாகவும் அவர் தெரிவிக்கிறார்.

https://www.instagram.com/reel/DdmVL90zx_F/?utm_source=ig_web_button_share_sheet

இந்த வீடியோ வெளியானது முதல், நெட்டிசன்கள் பலரும் தங்களது மாதச் சம்பளத்தை இந்தத் தேநீர் வியாபாரியின் வருமானத்தோடு ஒப்பிட்டுப் பேசி வருகின்றனர். சிலர் தங்களுக்கு மாதம் ரூ.9,000 மற்றும் ரூ.15,000 மட்டுமே கிடைப்பதாகக் கருத்து தெரிவித்து, தங்களது வருமானத்தைப் பற்றிச் சிந்திக்கத் தொடங்கியுள்ளனர். அதேவேளையில், வெளியில் இருந்து பார்ப்பதற்குத் தேநீர் விற்பனை எளிய வேலையாகத் தோன்றினாலும், அதிகாலையில் எழுவது, தேவையானப் பொருட்களைச் சேகரிப்பது, டீ தயாரித்து வாடிக்கையாளர்களுக்கு வழங்குவது மற்றும் நீண்ட நேரம் உழைப்பது என இதில் அதிக உழைப்பு அடங்கியுள்ளது என்றும் பலர் சுட்டிக்காட்டியுள்ளனர்.