மறந்துடீங்களா.? ஆளுநர் காத்துட்டு இருக்காரு… “எங்க ஆதரவை விலக்கினால் அமைச்சரவையே காலி” ஆதவ் அர்ஜுனாவுக்கு முத்தரசன் விடுத்த அதிரடி எச்சரிக்கை..!

தமிழக அரசியல் களத்தில் தவெக மற்றும் இடதுசாரி கட்சிகளுக்கு இடையே ஏற்பட்டுள்ள கூட்டணி மோதல் தற்போது மிகத்தீவிரமான எச்சரிக்கை போராக வெடித்துள்ளது. தமிழக வெற்றி கழகத்தின் முக்கிய நிர்வாகியான ஆதவ் அர்ஜுனா சமீபத்தில் இடதுசாரிகள் குறித்து வெளியிட்ட சில விமர்சனக் கருத்துக்கள் அரசியல் வட்டாரத்தில் பெரும் சலசலப்பை ஏற்படுத்தியிருந்தன. இதற்குப் பதிலடி கொடுக்கும் வகையில், இந்திய கம்யூனிஸ்ட் கட்சியின் முன்னாள் மாநிலச் செயலாளர் ஆர். முத்தரசன் தவெக அரசுக்கு மிகக் கடுமையான எச்சரிக்கை ஒன்றை விடுத்துள்ளார்.

முத்தரசன் தனது செய்தியாளர் சந்திப்பில், “தற்போதைய தவெக அமைச்சரவை என்பது சிபிஐ (CPI) மற்றும் சிபிஎம் (CPM) ஆகிய இடதுசாரி கட்சிகள் கொடுத்து வரும் ஆதரவின் பலத்தில்தான் நீடித்துக் கொண்டிருக்கிறது” என்று மிகத் தெளிவாகக் குறிப்பிட்டுள்ளார். மேலும், தவெக அரசுக்கு இடதுசாரிகள் வழங்கி வரும் இந்த ஆதரவைத் திரும்பப் பெற்றால், மாநிலத்தில் தற்போதைய மந்திரி சபையே நீடிக்காது என்றும் அவர் நேரடியாக எச்சரித்துள்ளார்.

இடதுசாரி தலைவர்களான பி. சண்முகம் மற்றும் மு. வீரபாண்டியன் ஆகியோர் தவெக அரசுக்கான தங்களது ஆதரவை எப்போது வாபஸ் பெறுவதாக அறிவிப்பார்கள் என்று தமிழக ஆளுநர் தற்போது ஆவலுடன் காத்துக்கொண்டிருக்கிறார் என்றும் முத்தரசன் சுட்டிக்காட்டியுள்ளார். தவெக நிர்வாகி ஆதவ் அர்ஜுனா இந்த அரசியல் எதார்த்தங்களை எல்லாம் தெரிந்துதான் பேசுகிறாரா அல்லது தெரியாமல் பேசுகிறாரா என்று தனக்குத் தெரியவில்லை எனக் கூறி, இந்த அதிரடிப் பதிலடியை அவர் நிறைவு செய்துள்ளார்.