“டாக்ஸிக்ன்னா என்னன்னு தெரியணுமா…? அப்போ ஒரு இந்திய மேலாளர் கிட்ட வேலை செஞ்சு பாருங்க..!” இணையத்தை ஆக்கிரமிக்கும் ‘Priyankur Diaries’-ன் வைரல் வீடியோ..!!

சிறந்த பணிச் சூழல் மற்றும் வாழ்க்கைத் தரத்தை நோக்கமாகக் கொண்டு பலர் ஆஸ்திரேலியாவிற்கு வேலை செய்யச் செல்கின்றனர். அதேபோன்று, ஆஸ்திரேலியா சென்ற இந்தியப் பணியாளர் ஒருவர், அங்கு தனக்கு அமைந்த இந்திய மேலாளரின் மோசமான மற்றும் கடுமையான நடத்தையால் பெரும் மன உளைச்சலுக்கு ஆளானார். “இந்தியர்கள்தான் மற்ற இந்தியர்களுக்குத் தொந்தரவு தருகிறார்கள்; நச்சுத்தன்மையான மேலாளர் என்றால் என்னவென்று தெரிய வேண்டுமானால், ஒரு இந்திய மேலாளரின் கீழ் பணியாற்ற வேண்டும்” என்று கூறி, அந்த நபர் தனது வேலையை ராஜினாமா செய்துள்ளார்.

தனது மடிக்கணினியை நிறுவனத்திடம் ஒப்படைத்துவிட்டு வேலையிலிருந்து வெளியேறும் காட்சிகளை Priyankur_diaries என்ற இன்ஸ்டாகிராம் பக்கத்தில் அவர் வீடியோவாகப் பகிர்ந்துள்ளார். அதில், நல்ல வேலைச் சூழலை எதிர்பார்த்து ஆஸ்திரேலியா வந்ததாகவும், ஆனால் தனது மேலாளரின் மோசமான அணுகுமுறையைச் சகிக்க முடியாமல் ராஜினாமா செய்துவிட்டதாகவும் தெரிவித்துள்ளார். ஆனால், அந்த வீடியோவின் இறுதியில் ஒரு பெரிய ஆச்சரியமாக, அவரே வேறொரு இடத்தில் மேலாளராகப் பணியில் சேர்ந்துவிட்டதாக அந்த மகிழ்ச்சியான செய்தியையும் பகிர்ந்துள்ளார்.

https://www.instagram.com/reel/DbircvMpy4e/?utm_source=ig_web_button_share_sheet

இணையத்தில் வேகமாகப் பரவி வரும் இந்த வீடியோவைப் பார்த்த பல பயனர்கள், இது 100% உண்மை என்றும் வெளிநாடுகளில் இதுபோன்ற சம்பவங்கள் அதிகம் நடப்பதாகவும் கருத்துத் தெரிவித்து வருகின்றனர். மேலும், சிலர் வேடிக்கையாக, “இப்போது நீங்களே மேலாளராகிவிட்டதால், இனி உங்களது ஊழியர்கள் உங்களைப் பற்றித்தான் இதுபோன்ற ரீல்ஸ்களை உருவாக்குவார்கள்” என்றும் கமெண்ட் செய்து வருகின்றனர்.