“என் ரத்தமே நீல நிறம்தான்..!” வதந்திகளுக்கு ஒற்றை வரியில் முற்றுப்புள்ளி வைத்த சூர்யகுமார் யாதவ்… குஷியில் மும்பை இந்தியன்ஸ் ரசிகர்கள்..!!

மும்பை இந்தியன்ஸ் அணியுடனான தனது நெடிய பயணம் குறித்து இந்திய அணியின் நட்சத்திர பேட்டர் சூர்யகுமார் யாதவ் மிகுந்த நெகிழ்ச்சியோடு பேசியுள்ளார். ‘ஹியூமன்ஸ் ஆஃப் பாம்பே’ தளத்திற்கு அளித்த நேர்காணலில், அடுத்த முறை தான் வான்கடே மைதானத்தில் காலடி எடுத்து வைக்கும்போது, அது மும்பை இந்தியன்ஸ் அணியில் தனது 10-வது ஆண்டாக இருக்கும் என்று அவர் குறிப்பிட்டுள்ளார். மும்பை அணியுடனான இந்த தசாப்த கால பந்தயம் ஒரு அற்புதமான பயணம் என்றும், மைதானத்தின் திருவிழா போன்ற சூழலில் விளையாடத் தான் எப்போதுமே பேரார்வத்துடன் இருப்பதாகவும் அவர் விவரித்துள்ளார்.

ஐந்து முறை சாம்பியனான மும்பை இந்தியன்ஸ் அணியின் மீது தனக்கிருக்கும் அலாதியான விசுவாசத்தையும் உணர்வுபூர்வமான பிணைப்பையும் வெளிப்படுத்திய சூர்யகுமார், “மும்பை அணிக்காக விளையாடுவதில் எனக்கு எப்போதுமே இருமடங்கு ஆர்வம் உண்டு; ஒருவேளை எனது ரத்தத்தைப் பரிசோதித்துப் பார்த்தால் அது கூட நீல நிறத்தில் தான் இருக்கும்” என்று உணர்ச்சிபொங்கக் கூறியுள்ளார். அண்மைக்காலமாக அவர் அணியை விட்டு விலகப் போகிறார் என்ற பல்வேறு வதந்திகள் பரவி வந்த நிலையில், சூர்யகுமார் யாதவின் இந்த அதிரடியான மற்றும் நெகிழ்ச்சியான அறிக்கை மும்பை இந்தியன்ஸ் ரசிகர்களை பெரும் குஷியில் ஆழ்த்தியுள்ளது.