“குடிப்பதற்குக் கூடத் தண்ணீர் இல்லை.. எங்களுக்குத் தண்ணீர் கொடுங்கள்..” அரசு விடுதி மாணவர்களின் நெஞ்சை உலுக்கும் கதறல்.. வைரலாகும் பகீர் வீடியோ..!!

தெலுங்கானா மாநிலம் விகாரபாத் மாவட்டம் பஷீராபாத் பகுதியில் உள்ள எஸ்சி மாணவர் விடுதியில், குடிப்பதற்குக் கூடத் தண்ணீர் இல்லாமல் மாணவர்கள் தவித்து வரும் அவலநிலை பெரும் அதிர்ச்சியை ஏற்படுத்தியுள்ளது. இந்த விடுதியில் தங்கியுள்ள மாணவர்கள் குடிநீர் இன்றியும், கழிவறையைப் பயன்படுத்தக் கூடத் தண்ணீர் இல்லாததால் வெளியிடங்களுக்குச் செல்ல வேண்டிய கட்டாயத்திற்கும் தள்ளப்பட்டுள்ளனர். தங்களது தினசரித் தேவைகளுக்காகவும், இயற்கை உபாதைகளைக் கழிப்பதற்காகவும் மாணவர்கள் அருகில் உள்ள காவல் நிலையம் மற்றும் எம்ஆர்சி கட்டிடத்திற்குச் சென்று தண்ணீர் பிடித்து வரும் அவலநிலை நீடிக்கிறது. “குடிப்பதற்குக் கூடத் தண்ணீர் இல்லை.. எங்களுக்குத் தண்ணீர் கொடுங்கள்” என்று மாணவர்கள் தங்களது வேதனையை வெளிப்படுத்தியுள்ளனர்.

இந்த விடுதியின் ஆழ்துளைக் கிணறு பழுதடைந்து ஒரு வருடத்திற்கும் மேலாகியும், இதுவரை எந்தவொரு பழுதுபார்ப்புப் பணிகளும் மேற்கொள்ளப்படவில்லை என்று மாணவர்கள் குற்றம் சாட்டியுள்ளனர். அரசின் ‘மிஷன் பகிரதா’ திட்டத்தின் கீழ் குடிநீர் இணைப்பு வழங்கப்பட்டிருந்த போதிலும், அதிலும் தண்ணீர் விநியோகம் செய்யப்படுவதில்லை. இந்தத் தண்ணீர் சிக்கலைத் தீர்க்க மாவட்ட ஆட்சியரின் நிதி ஒதுக்கப்பட்ட பின்னரும், விடுதி நிர்வாகத்தின் அலட்சியத்தால் ஆழ்துளைக் கிணறு இன்னும் சரிசெய்யப்படாமல் முடங்கிக் கிடக்கிறது. அதிகாரிகளின் இந்த மெத்தனப் போக்கைக் கண்டித்தும், தங்களுக்கு உடனடியாகத் தண்ணீர் வசதி செய்து தரக் கோரியும் மாணவர்கள் கடுமையான வேதனையில் போராடி வருகின்றனர்.