“மருமகள் மாட்டிய வழக்கில் மெகா ட்விஸ்ட்..!” கணவனைக் காப்பாற்றப் பலியாடான மனைவி.. நடந்தது என்ன..? மாமனார் கொலையில் போலீசாரை உறையவைத்த பின்னணி..!!

உத்தரப் பிரதேச மாநிலம் கான்பூரில் உள்ள கல்யான்பூரில், கடந்த செப்டம்பர் 5-ஆம் தேதி பிரபல மருந்து வணிகர் வினீத் மனோச்சா (60) என்பவர் அவரது அடுக்குமாடி குடியிருப்பில் கத்தியால் குத்தி கொடூரமாகக் கொலை செய்யப்பட்ட வழக்கில், அவரது சொந்த மகன் சுப்ரத் மனோச்சாவே தந்தையைக் கொல்லச் சதித் திட்டம் தீட்டிய முக்கியக் குற்றவாளி எனப் போலீஸார் அதிரடியாகக் கைது செய்துள்ளனர். பிர்ஹானா சாலையில் தனது தந்தையுடன் சேர்ந்து மருந்து நிறுவனத்தை நடத்தி வந்த சுப்ரத், ஐபிஎல் பெட்டிங் மற்றும் சூதாட்டம் காரணமாக சுமார் 40 லட்சம் ரூபாய்க்கும் மேல் கடன் சுமையில் மூழ்கியுள்ளார். அதேசமயம், 60 வயதான அவரது தந்தை வினீத்திற்குப் பல பெண்களுடன் தவறான தொடர்பு இருந்து வந்துள்ளது. இதனால் ஆத்திரமடைந்த தந்தை, தனது ஒட்டுமொத்த சொத்துக்களையும் வேறு ஏதேனும் ஒரு பெண்ணின் பெயருக்கு மாற்றிவிடுவாரோ என்ற பயத்தில், தந்தையைத் தீர்த்துக்கட்டச் சொந்த மகனே 6 லட்சம் ரூபாய் கொடுத்துக் கூலிப்படையை ஏவிய திடுக்கிடும் உண்மை போலீஸ் விசாரணையில் அம்பலமாகியுள்ளது.

இக்கொலைச் சம்பவம் நடந்த அடுத்த நாளே, வினீத்தின் மருமகள் ஷாலு மனோச்சா மற்றும் கூலிப்படையைச் சேர்ந்த விஷால், ராஜ்கிஷோர் ஆகியோரை காவல்துறையினர் கைது செய்திருந்தனர். ஆரம்பத்தில் இந்த மரணத்தை ஒரு விபத்தாகவோ அல்லது இயற்கையான மரணமாகவோ காட்டச் சுப்ரத் திட்டமிட்டிருந்தான்; ஆனால், பின்னர் திட்டம் மாற்றப்பட்டு வினீத் கொடூரமாகக் கொலை செய்யப்பட்டார். தான் மாட்டிக் கொண்டால், சந்தேகத்தைத் தன் மனைவி ஷாலுவின் மீது திருப்புமாறு கூலிப்படைத் தலைவன் விஷாலிடம் சுப்ரத் ஏற்கனவே அறிவுறுத்தியிருந்தான். அதன்படியே விஷாலும் போலீஸாரிடம் ஷாலுவின் பெயரைக்கூறி நாடகமாடியுள்ளார். இதனால், காவல்துறையினர் முதலில் ஷாலுவைக் கைது செய்த போதிலும், சுப்ரத் மற்றும் விஷால் இடையே அழிக்கப்பட்ட மொபைல் சாட்டிங்குகள், சிசிடிவி காட்சிகள் மற்றும் ஒரே இடத்தில் பதிவான அவர்களது மொபைல் லொகேஷன் ஆகிய டிஜிட்டல் மற்றும் அறிவியல் பூர்வ ஆதாரங்களை ஆய்வு செய்தபோதுதான் மகனின் சதித் திட்டம் வெளிச்சத்திற்கு வந்தது.காவல்துறையினரின் அதிரடி விசாரணையின் போது, தன் மீதான குற்றச்சாட்டைச் சுப்ரத் ஒப்புக்கொள்ள மறுத்த போதிலும், அவரது மனைவி ஷாலு போலீஸ் விசாரணையில் உடைந்துபோய், தன் கணவனைக் காப்பாற்றுவதற்காகத் தான் இதில் பலியாடாக்கப்பட்டதாகக் கண்ணீருடன் வாக்குமூலம் அளித்துள்ளார்.

தற்போதைய விசாரணையில் ஷாலுவிற்கு இந்தக் கொலையில் நேரடித் தொடர்பு இருப்பதற்கான போதிய ஆதாரங்கள் கிடைக்காததால், அவர் இந்த வழக்கிலிருந்து விடுவிக்கப்படுவதற்கான வாய்ப்புகள் அதிகரித்துள்ளதாகக் கான்பூர் போலீஸ் கமிஷனர் ரகுபீர் லால் தெரிவித்துள்ளார். இருப்பினும், அவருக்கு இன்னும் முழுமையான ‘க்ளீன் சிட்’ (Clean chit) வழங்கப்படவில்லை என்றும், தொடர்ந்து விசாரணை நடத்தப்பட்டு வருவதாகவும் போலீஸார் குறிப்பிட்டுள்ளனர். இதற்கிடையே, கொலையாளிகள் அடையாளம் காட்டிய இடங்களில் இருந்து இரத்தக்கறை படிந்த ஆடைகள், முகமூடி மற்றும் காரின் சாவிகள் ஆகியவற்றை மீட்ட போலீஸார், சுப்ரத்தை நீதிமன்றத்தில் ஆஜர்படுத்தி வியாழக்கிழமை சிறையில் அடைத்தனர்.