அம்மா மருத்துவமனையில்… அப்பாவும் 3 தம்பிகளும் பிணவறையில்..! தவிக்கும் இரு சிறுவர்களின் சோகக் கதை..!!

ராஜஸ்தான் மாநிலம் ராஜ்ஸமந்த் மாவட்டத்தின் ஜேத்புரா கிராமத்தைச் சேர்ந்த சந்திரபிரகாஷ் வாகரியா என்ற ஏழைத் தொழிலாளி, காடுகளில் இருந்து பேரீச்சம்பழக் கிளைகளைச் சேகரித்து, ஜெய்ப்பூரில் துடைப்பம் தயாரித்து விற்றுத் தன் குடும்பத்தைக் காப்பாற்றி வந்தார். பள்ளி கோடை விடுமுறை முடிந்து தன் குடும்பத்துடன் சொந்த ஊருக்குத் திரும்புவதற்காக, ஜெய்ப்பூர் அஜ்மீர் சாலையிலுள்ள 200 அடி பைபாஸ் பேருந்து நிறுத்தத்தில் அவர் காத்துக் கொண்டிருந்தார். அப்போது, கட்டுப்பாட்டை இழந்த அதிவேக ட்ரெய்லர் லாரி ஒன்று அவர்கள் மீது மோதியதில், சந்திரபிரகாஷ் மற்றும் அவரது மூன்று சிறு மகன்களான ரமேஷ், கோபால், தீபக் ஆகியோர் சம்பவ இடத்திலேயே பரிதாபமாக உயிரிழந்தனர். இந்த விபத்தில் படுகாயமடைந்த அவரது மனைவி கைலாஷி தேவி ஜெய்ப்பூர் மருத்துவமனையில் தீவிர சிகிச்சை பெற்று வருகிறார்.

விபத்தில் உயிரிழந்த தந்தை மற்றும் மூன்று மகன்களின் உடல்கள் சொந்த ஊரான ஜேத்புரா கிராமத்திற்கு கொண்டு வரப்பட்டபோது, அங்கு பெரும் சோக அலை வீசியது. ஒரே குடும்பத்தைச் சேர்ந்த நால்வரின் உடல்களும் ஒன்றாகக் கொண்டு செல்லப்பட்டபோது கிராம மக்கள் அனைவரும் கண்ணீர் விட்டு அழுதனர். சந்திரபிரகாஷின் எஞ்சிய இரு மகன்களான தினேஷ் மற்றும் ரத்தன் ஆகிய சிறுவர்கள், தங்கள் தந்தை மற்றும் மூன்று சகோதரர்களின் உடல்களுக்குக் கலங்கிய கண்களுடன் இறுதிச் சடங்குகளைச் செய்து தீ மூட்டினர். இவர்களது 90 வயது முதிய தாத்தா ஹீரலால், தன் மகன் மற்றும் மூன்று பேரன்களின் உடல்களை ஒரே நேரத்தில் பார்த்து நிலைகுலைந்து போனார். இந்தத் துயரச் சம்பவத்தால் ஒட்டுமொத்த கிராமமே சோகக் கடலில் மூழ்கியது.

இந்த நெஞ்சை உலுக்கும் விபத்து குறித்து அறிந்த மக்களவை சபாநாயகர் ஓம் பிர்லா, உயிரிழந்த சந்திரபிரகாஷின் அண்ணனிடம் தொலைபேசியில் பேசி தனது ஆழ்ந்த இரங்கலைத் தெரிவித்தார். மேலும், ராஜஸ்தான் முதலமைச்சர் பஜன்லால் சர்மாவின் வழிகாட்டுதலின்படி, பாதிக்கப்பட்ட குடும்பத்திற்கு மாநில அரசின் சார்பில் 10 லட்சம் ரூபாய் நிதியுதவி அறிவிக்கப்பட்டுள்ளது. அத்துடன், படுகாயமடைந்து சிகிச்சை பெற்று வரும் தாய்க்கு தனியார் மருத்துவமனை பங்களிப்புடன் வாழ்நாள் முழுவதும் மாதந்தோறும் 10,000 ரூபாய் வழங்கவும், ஆதரவற்ற நிலையில் தவிக்கும் இரு சிறுவர்களின் கல்வி, எதிர்காலம் மற்றும் அவர்களுக்கான பக்கா வீடு கட்டித் தரும் பொறுப்பையும் ஏற்பதாக ஓம் பிர்லா உறுதியளித்துள்ளார்.