“சந்தேகத்தால் நேர்ந்த கொடூரம்..” மனைவியைக் கொன்றுவிட்டு ரத்த ஆடைகளை சாக்கடையில் வீசிய கணவன்..! அப்பாவுக்கு கடுமையான தண்டனை வேண்டும்’ என கதறும் மகள்..!!

மத்திய பிரதேச மாநிலம் இந்தூரில் உள்ள தபால் துறை குடியிருப்பில் வசித்து வந்த உதவி தபால் கண்காணிப்பாளர் உர்மிளா சைனி, அவரது கணவர் அகிலேஷ் சைனியால் கத்தியால் குத்திக் கொடூரமாகக் கொலை செய்யப்பட்டுள்ளார். கொலை செய்த பின்னர், குற்றம் சாட்டப்பட்ட கணவர் குளித்துவிட்டு, ரத்தம் படிந்த ஆடைகளை சாக்கடையில் வீசிவிட்டு சம்பவ இடத்திலிருந்து தப்பியோடியுள்ளார். இந்தச் சம்பவம் நடந்து 48 மணி நேரத்திற்கு மேலாகியும் முக்கிய குற்றவாளியான அகிலேஷ் சைனியை காவல்துறை கைது செய்யாததால், ஆத்திரமடைந்த உறவினர்களும் பொதுமக்களும் சன்யோகிதாகஞ்ச் காவல் நிலையத்திற்கு வெளியே திரண்டு தங்களுக்கு நீதி வேண்டி போராட்டத்தில் ஈடுபட்டனர்.

உயிரிழந்த உர்மிளாவின் மகள் பிரேக்ஷா சைனி தனது தந்தை மீது கடுமையான குற்றச்சாட்டுகளை முன்வைத்துள்ளார். தனது தந்தை நீண்ட நாட்களாகத் தாயை மனரீதியாகத் துன்புறுத்தி வந்ததாகவும், தேவையில்லாமல் அவர் மீது சந்தேகப்பட்டு குடும்பத்தில் அடிக்கடி சண்டையிட்டதாகவும் அவர் கூறியுள்ளார். மேலும், தனது தாயைக் கொடூரமாகக் கொன்ற தனது தந்தைக்குச் சட்டப்படி கடுமையான தண்டனை வழங்கப்பட வேண்டும் என்றும், இந்த கொலை முன்கூட்டியே திட்டமிடப்பட்டு, இதற்காக ஆன்லைன் மூலம் கத்தி ஆர்டர் செய்யப்பட்டு வாங்கப்பட்டுள்ளது என்றும் மகள் பிரேக்ஷா தெரிவித்துள்ளார்.

கணவன்-மனைவி இடையே நீண்ட நாட்களாக இருந்த தகராறு மற்றும் சந்தேகமே இந்தக் கொலைக்குக் காரணமாக இருக்கலாம் என்று முதற்கட்ட விசாரணையில் தெரியவந்துள்ளது. தப்பியோடிய குற்றவாளியைக் கைது செய்ய காவல்துறை தனிப்படைகளை அமைத்து மத்திய பிரதேசம் மற்றும் அண்டை மாநிலங்களில் தீவிரமாகத் தேடி வருகிறது. தொழில்நுட்ப ஆதாரங்களின் அடிப்படையில் விசாரணை முன்னேறி வருவதாகவும், விரைவில் குற்றவாளி கைது செய்யப்பட்டு நீதிமன்றத்தில் ஆஜர்படுத்தப்படுவார் என்றும் காவல்துறை உறுதியளித்துள்ளது.