“அவனுக்கு மரண தண்டனை கொடுங்க!”.. 7 வயது சிறுமியை ஏமாற்றி வன்கொடுமை செய்த வாட்ச்மேன்.. காவல் நிலையத்தை முற்றுகையிட்ட மக்கள்… மும்பையில் பரபரப்பு..!!

மகாராஷ்டிர மாநிலம் மும்பையின் பைதோனி பகுதியில் 7 வயது சிறுமிக்கு பாலியல் வன்கொடுமை செய்ததாகக் கிடங்கு வாட்ச்மேன் கைது செய்யப்பட்டுள்ள சம்பவம் பெரும் அதிர்ச்சியை ஏற்படுத்தியுள்ளது. பாதிக்கப்பட்ட சிறுமி தனது வீட்டிற்கு அருகே உள்ள பொதுக் கழிப்பறையைப் பயன்படுத்துவதற்காகத் தனியாகச் சென்றபோது, அங்கிருந்த கிடங்கின் வாட்ச்மேன் யாரும் இல்லாததை நோட்டமிட்டு, அச்சிறுமியை ஏமாற்றிக் கட்டிடத்தின் மேல்தளத்திற்கு அழைத்துச் சென்று இந்தத் துரோகத்தை இழைத்துள்ளார். சிறுமி நீண்ட நேரமாகியும் வீடு திரும்பாததால் அவரது தாய் தேடத் தொடங்கிய நிலையில், கிடங்கு அருகே சந்தேகத்திற்கிடமான சூழலைக் கவனித்த இரண்டு பெண்கள் உள்ளே சென்று பார்த்து, மன உளைச்சலில் இருந்த சிறுமியை மீட்டுப் பொதுமக்களுக்கும் காவல்துறைக்கும் தகவல் கொடுத்தனர். இதனால் ஆத்திரமடைந்த பொதுமக்கள் அந்த வாட்ச்மேனைப் பிடித்துச் சரமாரியாகத் தாக்கி காவல்துறையிடம் ஒப்படைத்ததோடு, குற்றவாளிக்கு மரண தண்டனை வழங்கக் கோரி காவல் நிலையத்தின் முன்பு திரண்டு போராட்டத்தில் ஈடுபட்டனர்.

இதனையடுத்து, மீட்கப்பட்ட சிறுமி மும்பை அரசு மருத்துவமனையில் அனுமதிக்கப்பட்டு, தகுந்த சிகிச்சை அளிக்கப்பட்டு தற்பொழுது சீரான உடல்நிலையுடன் உள்ளார். இச்சம்பவம் குறித்து ஞாயிற்றுக்கிழமை மதியம் தகவல் கிடைத்ததும் விரைந்து நடவடிக்கை எடுத்த போலீசார், குற்றம் சாட்டப்பட்டவரைக் கைது செய்ததாக மண்டலம்-2 துணை காவல் ஆணையர் விஜயகாந்த் சாகர் தெரிவித்துள்ளார். கைதான நபர் மீது போக்சோ (POCSO) சட்டம் மற்றும் பாரதிய நியாய சம்ஹிதா (BNS) சட்டத்தின் தொடர்புடைய பிரிவுகளின் கீழ் வழக்கு பதிவு செய்யப்பட்டுள்ளது. இந்த வழக்கில் அனைத்து கோணங்களிலும் தீவிர விசாரணை நடைபெற்று வருவதாகவும், சேகரிக்கப்படும் ஆதாரங்களின் அடிப்படையில் குற்றவாளிக்குச் சட்டப்படி கடுமையான நடவடிக்கை உறுதி செய்யப்படும் என்றும் காவல்துறை அதிகாரிகள் தெரிவித்துள்ளனர்.