“கூட்டத்தை மாற்றி மாற்றி மாஸ் காட்டும் ஆண் யானைகள்” ஜிம் கார்பெட் காட்டில் வைரலாகும் வீடியோ.. தனியாக லாங் டிராவல் செய்வதன் பின்னணியில் இருக்கும் செம சயின்ஸ்..!!

உத்தரகண்ட் மாநிலத்தின் உலகப் புகழ்பெற்ற ஜிம் கார்பெட் தேசிய பூங்காவில், முதிர்ந்த ஆண் யானை ஒன்று தனியாக நீண்ட தூரம் பயணம் செய்யும் வீடியோ சமூக வலைதளங்களில் வெளியாகி வைரலாகி வருகிறது. வனவிலங்கு ஆர்வலர் தீபக் மல்கானி என்பவரால் பகிரப்பட்ட இந்த வீடியோ, சுற்றுலாப் பயணிகளைக் கவர்ந்தது மட்டுமின்றி, ஆண் யானைகளின் தனித்துவமான சமூகப் பழக்கவழக்கங்கள் குறித்த புதிய விவாதங்களையும் ஏற்படுத்தியுள்ளது.

வனவிலங்கு நிபுணர்களின் கூற்றுப்படி, பெண் யானைகளும் அவற்றின் குட்டிகளும் எப்போதும் ஒரு வயதான பெண் யானையின் தலைமையில் வலுவான கூட்டமாகவே வாழ்கின்றன. ஆனால், ஆண் யானைகள் பருவமடைந்தவுடன் தங்கள் கூட்டத்தை விட்டு நிரந்தரமாக வெளியேறிவிடுகின்றன. அவை நீண்ட காலம் ஒரே இடத்திலோ அல்லது ஒரே கூட்டத்திலோ தங்குவதில்லை; மாறாக, காடுகளின் பரந்த பகுதிகளுக்குள் தனியாக சுதந்திரமாக உலா வருகின்றன.

ஆண் யானைகள் இப்படி அடிக்கடி தங்கள் கூட்டத்தை மாற்றுவதற்கும், நீண்ட தூரம் தனியாகப் பயணம் செய்வதற்கும் மிக முக்கியமான அறிவியல் காரணங்கள் உள்ளன. வெவ்வேறு கூட்டங்களில் உள்ள பெண் யானைகளுடன் அவை இணை சேர்வதன் மூலம், யானையினத்தின் அடுத்த தலைமுறையில் மரபணு பன்முகத்தன்மை பராமரிக்கப்பட்டு, நெருங்கிய உறவுகளுக்குள் இனப்பெருக்கம் செய்யும் ஆபத்து தவிர்க்கப்படுகிறது. மேலும், புத்திசாலி விலங்குகளான இவை உணவு, தண்ணீர் மற்றும் சாதகமான இயற்கை சூழலைத் தேடியும் பல கிலோமீட்டர் தூரம் பயணிக்கின்றன.