“செருப்புக்குள் மறைந்திருந்த ரகசிய கேமரா..!” பெண்களின் ஆடைகளுக்கு அடியில் படம் பிடித்த 35 வயது வக்கிர ஆசாமி.. நடுக்க வைக்கும் சம்பவம்..!!

அமெரிக்காவின் வடக்கு கலிபோர்னியாவில் உள்ள பெர்க்லி பகுதியில், பாலியல் வக்கிர குணம் படைத்த நபர் ஒருவர் தனது காலணிகளில் ரகசிய கேமராக்களைப் பொருத்திப் பெண்களையும், சிறுமிகளையும் அவர்களின் ஆடைகளுக்கு அடியில் அத்துமீறிப் படம் பிடித்த அதிர்ச்சி சம்பவம் வெளிச்சத்திற்கு வந்துள்ளது. இது தொடர்பாக ஓக்லாந்தைச் சேர்ந்த நோவா ஸ்டெய்ன் (35) என்ற நபர் அக்டோபர் 30 அன்று பெர்க்லி காவல்துறையினரால் அதிரடியாகக் கைது செய்யப்பட்டுள்ளார். கலிபோர்னியாவின் யூசி பெர்க்லி பல்கலைக்கழகத்திற்கு அருகிலுள்ள ஒரு பிரபலமான உணவகத்தில் வரிசையில் காத்திருந்த பதின்ம வயதுப் பெண் ஒருவர், தனது பாவாடைக்கு அடியில் ஒரு நபர் காலணி கேமரா மூலம் வீடியோ எடுப்பதாக அக்டோபர் 26 அன்று சந்தேகத்தின் பேரில் அளித்த புகாரைத் தொடர்ந்து இந்த விபரீத மோசடி கும்பல் அம்பலமானது.

பாதிக்கப்பட்ட அந்த இளம் பெண் தவறுதலாக அந்த நபரின் காலை மிதித்தபோது, தன்னை நோக்கிக் கேமரா சாதனம் ஒன்று வைக்கப்பட்டிருந்ததை உன்னிப்பாகக் கவனித்துக் காவல்துறையிடம் தெரிவித்துள்ளார். துப்பறிவாளர்கள் தொழில்நுட்பக் கருவிகளின் உதவியுடன் சம்பவ இடத்திலிருந்து ஆதாரங்களைச் சேகரித்து விசாரணை நடத்தி வந்த நிலையில், அக்டோபர் 30 அன்று ரோந்துப் பணியில் இருந்த அதிகாரியிடம் ஒரு நபர் அளித்த தகவல் பெரிய திருப்புமுனையாக அமைந்தது. தன் காலணியில் கேமராவைப் பொருத்திப் பெண்களைப் படம் பிடித்துக் கொண்டிருந்த சந்தேக நபரை அடையாளம் காட்டியதை அடுத்து, போலீசார் ஸ்டெய்னை உடனடியாகக் கைது செய்தனர். மேலும், அவர் தப்பிக்க முயன்றபோது அருகிலிருந்த குப்பைத் தொட்டியில் வீசிய ஒரு மினி கேமராவையும் அதிகாரிகள் சம்பவ இடத்திலிருந்து மீட்டெடுத்துள்ளனர்.

இதனைத் தொடர்ந்து ஓக்லாந்தில் உள்ள சந்தேக நபரின் வீட்டில் நீதிமன்ற அனுமதியுடன் சோதனை நடத்திய துப்பறிவாளர்கள், அங்கிருந்த ஏராளமான மின்னணு சாதனங்களைப் பறிமுதல் செய்துள்ளனர். மேலும், அக்டோபர் 29 அன்று அப்பகுதியில் உள்ள டாக்கோ பெல் கேன்டினிற்குள் ரகசியமாக மறைத்து வைக்கப்பட்டிருந்த மற்றொரு கேமராவையும் காவல்துறையினர் கண்டுபிடித்துள்ளனர். ஸ்டெய்ன் பல வாரங்களாகப் பல இடங்களுக்குச் சென்று நூற்றுக்கணக்கான இளம்பெண்கள் மற்றும் சிறுமிகளை ரகசியமாகப் பதிவு செய்திருக்கலாம் என்று காவல்துறையினர் சந்தேகிக்கின்றனர். மறைத்து வைக்கப்பட்ட வீடியோ பதிவு செய்யும் கருவியைப் பயன்படுத்தி அத்துமீறுதல், சிறுவர்களைத் துன்புறுத்துதல் மற்றும் ஆதாரங்களை அழித்தல் உள்ளிட்ட பல கடுமையான குற்றச்சாட்டுகளின் கீழ் ஸ்டெய்ன் மீது தற்போது உயர்மட்ட விசாரணை நடத்தப்பட்டு வருகிறது.