“எம்மாடி..! ஜஸ்ட் மிஸ்… காட்டுக்குள்ள போயிருச்சுன்னு நினைச்சு காரை நகர்த்திய அந்த நொடி… திடீர்னு முன்னாடி வந்து நின்ன ஆக்ரோஷ யானை… நூலிழையில் உயிர் தப்பிய கேரள குடும்பத்தின் திக் திக் வீடியோ..!!

கேரள மாநிலம் திருக்கைப்பேட்டா தூய தாமஸ் யாக்கோபாய தேவாலயத்தின் விகார் தந்தையான ரெஜி பால் மற்றும் அவரது குடும்பத்தினர் குண்ட்லுபேட்டையிலிருந்து திரும்பிக் கொண்டிருந்தபோது, சுல்தான் பத்தேரி – குண்ட்லுபேட்டை சாலையில் இந்த அதிர்ச்சி சம்பவம் நடந்துள்ளது. வியாழக்கிழமை மாலை 4:30 மணியளவில் மூன்று காட்டு யானைகள் சாலையைக் கடக்க முயன்றதால், அந்த வழியே வந்த வாகனங்கள் அனைத்தும் நிறுத்தப்பட்டன. யானைகள் காட்டுப் பகுதிக்குள் சென்றதாக நினைத்து, வாகனங்கள் மெதுவாக நகரத் தொடங்கின. அப்போது ஒரு டிராவலர் வாகனமும், அதன்பின் ஒரு எர்டிகா காரும் செல்ல, தந்தையான ரெஜி பாலின் குடும்பம் இருந்த வாகனம் அதற்குப் பின்னால் சென்று கொண்டிருந்தது.

ஆனால், எதிர்பாராதவிதமாக காட்டுப் பகுதிக்குள் சென்ற யானைகளில் ஒன்று திடீரென மீண்டும் சாலையை நோக்கித் திரும்பி, முன்னால் சென்ற எர்டிகா காரை நோக்கி ஆக்ரோஷமாகப் பாய்ந்தது. வாகனங்கள் அடுத்தடுத்து அணிவகுத்து நின்றதாலும், நகர்வதற்குப் போதிய இடம் இல்லாததாலும் ரெஜி பாலின் குடும்பம் இருந்த வாகனம் யானைக்கு மிக அருகில் சிக்கிக் கொண்டது. ஒரு சாதாரண வனவிலங்கு பார்வையாகத் தொடங்கியது, ஒரு நொடியில் உயிருக்கு ஆபத்தான சம்பவமாக மாறிய போதிலும், நல்வாய்ப்பாக இச்சம்பவத்தில் யாருக்கும் எந்தவித காயமும் ஏற்படாமல் குடும்பத்தினர் தப்பினர்.

இந்த பதற்றமான தருணங்களை காரில் இருந்தவர்கள் வீடியோவாகப் பதிவு செய்த நிலையில், அது சமூக வலைதளங்களில் வைரலாகி பெரும் கவனத்தைப் பெற்றுள்ளது. தங்களுக்கு நேர்ந்த அனுபவத்தை தந்தை ரெஜி பால் பின்னர் விவரித்தார். இந்த வீடியோவைக் கண்ட இணையவாசிகள் குடும்பத்தினரின் பாதுகாப்பைக் குறித்து கவலை தெரிவித்த அதேவேளையில், சிலர் அவர்களின் சில நடவடிக்கைகளை விமர்சித்தும் கருத்துகளைப் பதிவிட்டு வருகின்றனர். வனப்பகுதியை ஒட்டிய சாலைகளில் பயணிக்கும் போது இதுபோன்ற காட்டு யானைகளின் திடீர் நடமாட்டத்தால் ஏற்படும் ஆபத்துகளை இச்சம்பவம் நினைவூட்டுவதாக அமைந்தது.