அய்யோ கொடுமையே…! 11 மணி நேரம் தண்டவாளத்தில் கிடந்த சடலம்.. காகங்கள் கொத்தக் கண்ணீருடன் காவல் காத்த குடும்பம்.. ரயில்வே நிர்வாகத்தின் அலட்சியத்தால் அரங்கேறிய சோகம்..!!

பீகார் மாநிலம் ஜமுயியில் உள்ள ரயில்வே தண்டவாளத்தில் பெண் ஒருவர் உயிரிழந்த சம்பவத்தில், உடலை மீட்க சுமார் 11 மணி நேரம் தாமதமானதும், அதை எடுத்துச் செல்ல ஸ்ட்ரெச்சர் கிடைக்காததால் உறவினர்கள் உடலை மூட்டையில் கட்டி எடுத்துச் சென்றதும் ரயில்வே நிர்வாகத்தின் அலட்சியத்தை வெளிச்சத்திற்குக் கொண்டுவந்துள்ளன. மலைய்பூரைச் சேர்ந்த அசோக் சிங் என்பவரின் மனைவி அஞ்சு தேவி (50) சனிக்கிழமை மாலை முதல் காணாமல் போன நிலையில், இரவில் தண்டவாளத்தில் பெண் ஒருவர் ரயிலில் அடிபட்டு இறந்து கிடப்பதாகத் தகவல் கிடைத்தது. இருள் காரணமாக உடலை உடனடியாக அடையாளம் காண முடியாத நிலையில், ஞாயிற்றுக்கிழமை காலை புடவையை வைத்து இறந்தவர் அஞ்சு தேவி என்பதை உறவினர்கள் உறுதிசெய்தனர்.

உடலை எடுத்துச் செல்ல அரசு ரயில்வே காவல் துறை சார்பில் ஸ்ட்ரெச்சரோ அல்லது ஆம்புலன்ஸ் வசதியோ செய்து தரப்படவில்லை என்றும், இதனால் தண்டவாளத்திலேயே கிடந்த உடலைக் காகங்கள் கொத்தத் தொடங்கியதாகவும் இறந்தவரின் சகோதரர் குற்றம் சாட்டினார். அதிகாரிகளும் ரயில்வே ஊழியர்களும் சற்றுத் தொலைவிலேயே நின்று கொண்டதால், உடலை விலங்குகளிடமிருந்து பாதுகாக்க உறவினர்களே பல மணி நேரம் காவல் காக்க வேண்டிய நிலை ஏற்பட்டது. இறுதியில் ஸ்ட்ரெச்சர் கிடைக்காததால், ரயில்வே துப்புரவுப் பணியாளரின் உதவியுடன் உடலை ஒரு சணல் மூட்டையில் கட்டி, உறவினர்களே சுமந்து சென்று மலைய்பூர் ரயில் கேட் அருகில் நின்ற டெம்போவில் ஏற்றி பிரேத பரிசோதனைக்காகச் சதர் மருத்துவமனைக்கு அனுப்பி வைத்தனர்.

இச்சம்பவம் குறித்து ஸ்டேஷன் மாஸ்டர் தெரிவிக்கையில், ஞாயிற்றுக்கிழமை காலை 5:35 மணிக்குத் தகவல் கிடைத்து 5:45 மணிக்கு ஜிஆர்பி-க்குத் தெரிவிக்கப்பட்டதாகக் கூறினார். ஜிஆர்பி காவல் நிலைய அதிகாரி ஷ்ரவன் குமார் கூறுகையில், முதற்கட்ட விசாரணையில் பெண் ரயிலில் அடிபட்டு இறந்ததாகத் தெரிவதாகவும், வழக்கு விசாரணை நடைபெற்று வருவதாகவும் தெரிவித்தார். ஸ்ட்ரெச்சர் வழங்கப்படாதது குறித்துக் கேட்டபோது, தங்களிடம் ஸ்ட்ரெச்சர் உள்ளதாகவும், அது வேறு இடத்திற்குச் சென்றிருக்கலாம் என்றும் அவர் நியாயப்படுத்தினார். எனினும், 100 மீட்டர் தொலைவில் உள்ள உடலை அகற்ற 11 மணி நேரம் தாமதமானதுடன், மூட்டையில் கட்டிச் சுமந்து செல்லும் அவல நிலை ஏற்பட்டது ரயில்வே நிர்வாகத்தின் மனிதாபிமானமற்ற போக்கையும் அவசர கால அமைப்பின் தோல்வியையும் கேள்விக் குறியாக்கியுள்ளது.