“நான் சொன்னப்ப ஓட்டுனீங்களே.. இப்ப எங்க போனீங்க..?” சுற்றுச்சூழல் அமைச்சரை வச்சு செய்யும் செல்லூர் ராஜு.. பரபரக்கும் அரசியல் களம்..!!

திருப்பூர் நொய்யல் ஆற்றில் நுரை பொங்குவதற்கு சோப்பு, ஷாம்பு பயன்பாடுதான் காரணம் என்று சுற்றுச்சூழல் துறை அமைச்சர் வி.கே. ராஜீவ் அளித்த விளக்கம் அரசியல் வட்டாரத்தில் பெரும் விவாதத்தையும் விமர்சனங்களையும் கிளப்பியுள்ளது. வடகிழக்கு பருவமழை காரணமாக நொய்யல் ஆற்றில் வெள்ளப்பெருக்கு ஏற்பட்டுள்ள நிலையில், தனியார் ஆலைகளின் ரசாயனக் கழிவுகள் கலப்பதால் தான் நுரை பொங்குவதாக பொதுமக்கள் குற்றம் சாட்டி வந்தனர். இந்நிலையில், காசிபாளையம் பொது சுத்திகரிப்பு நிலையத்தில் ஆய்வு மேற்கொண்ட அமைச்சர், மழைக் காலங்களில் சோப்பு, ஷாம்பு கலந்த தண்ணீர் ஆற்றில் கலப்பதால் தான் இவ்வாறு நடப்பதாகக் குறிப்பிட்டதுடன், விதிகளை மீறும் ஆலைகள் மீது கடுமையான நடவடிக்கை எடுக்கப்படும் என்றும் தெரிவித்தார்.

அமைச்சரின் இந்த சர்ச்சைக்குரிய விளக்கத்திற்கு பாமக தலைவர் அன்புமணி ராமதாஸ் தனது கடும் கண்டனத்தைப் பதிவு செய்துள்ளார். ஆறுகளில் நுரை பெருக்கெடுப்பதற்கு சோப்பு மற்றும் ஷாம்பு தான் காரணம் என்று சுற்றுச்சூழல் அமைச்சர் கூறியிருப்பது அதிர்ச்சியளிப்பதாகவும், வருத்தமளிப்பதாகவும் அவர் தெரிவித்துள்ளார். மேலும், இது போன்ற நகைச்சுவைகளைச் செய்வதைத் தவிர்த்துவிட்டு, ஆறுகளில் மாசு ஏற்படுவதைத் தடுத்து அவற்றைப் பாதுகாக்க சுற்றுச்சூழல் அமைச்சர் தகுந்த நடவடிக்கைகளை உடனடியாக எடுக்க வேண்டும் என்றும் அன்புமணி ராமதாஸ் வலியுறுத்தியுள்ளார்.

இதற்கிடையே, அதிமுக முன்னாள் அமைச்சர் செல்லூர் ராஜுவும் தன் பாணியில் இந்த விவகாரத்தைக் கிண்டல் செய்துள்ளார். “ஷாம்பு, சோப்பால் ஆற்றில் நுரை வருதுன்னு சொன்ன அமைச்சருக்கு ‘நோபல் பரிசே’ கொடுக்கலாம், இது உலகமகா கண்டுபிடிப்பு” என்று விமர்சித்துள்ளார். மேலும், தான் முன்பு ‘ஈஜிப்ட்’ மற்றும் ‘தெர்மாகோல்’ பற்றிப் பேசியபோது கடுமையாக ஓட்டியவர்கள், தற்போது அமைச்சரின் இந்த விசித்திரமான விளக்கத்தைக் கண்டு கொள்ளாமல் இருப்பது ஏன் என்று நகைச்சுவையாகக் கேள்வி எழுப்பியுள்ளார்.