பகலில் நடந்த கொடூரம்.. 83 வயது பாட்டியிடம் கைவரிசை காட்டிய பைக் கொள்ளையர்கள்.. நெஞ்சை உலுக்கும் சிசிடிவி காட்சி..!!

பஞ்சாப் மாநிலம் மோகாவில் உள்ள அர்ஜுன் தேவ் நகரில், முகவரி கேட்பது போல நடித்து 83 வயது முதியவர் ஹர்ஜித் கவுரிடம் தங்கக் காதணிகளைப் பறித்துச் சென்ற இருசக்கர வாகனக் கொள்ளையர்களில் ஒருவர் காவல்துறையினரால் அதிரடியாகக் கைது செய்யப்பட்டுள்ளார். தனது வீட்டின் வெளியே நாற்காலியில் அமர்ந்திருந்த முதியவரிடம், மோட்டார் சைக்கிளில் வந்த இரு இளைஞர்கள் முகவரி கேட்பது போல் பேச்சுக் கொடுத்து, திடீரென அவரது காதுகளில் இருந்த கம்மல்களைப் பறித்துக் கொண்டு தப்பி ஓடினர். இந்த அதிர்ச்சியூட்டும் திருட்டுச் சம்பவம் அங்குள்ள சிசிடிவி கேமராவில் பதிவாகி சமூக வலைத்தளங்களில் பரவி பெரும் பரபரப்பை ஏற்படுத்தியது.

பாதிக்கப்பட்ட குடும்பத்தினரின் புகாரைத் தொடர்ந்து, மோகா பகுதி காவல்துறையினர் அப்பகுதியில் உள்ள சிசிடிவி காட்சிகளை தீவிரமாக ஆய்வு செய்து விசாரணையைத் தொடங்கினர். இந்த விரைவான நடவடிக்கையின் மூலம் குற்றவாளிகளின் நடமாட்டம் கண்டறியப்பட்டு, பர்மிந்தர் சிங் என்ற முதன்மை குற்றவாளி கைது செய்யப்பட்டதோடு, அவரிடமிருந்து திருடப்பட்ட தங்க நகைகளும் மீட்கப்பட்டன. இச்சம்பவத்தில் தொடர்புடைய இந்தர்ஜித் சிங் என்ற மற்றொரு தலைமறைவு குற்றவாளியை காவல்துறையினர் தீவிரமாகத் தேடி வருகின்றனர்.