ஐயோ கொடுமையே.. வீட்டில் இருந்த ஒரு பாட்டில் இருமல் மருந்து.. 4 வயது சிறுமியின் உயிரைப் பறித்த கொடூரம்.. நெஞ்சை உலுக்கும் பின்னணி..!!

உத்தரப் பிரதேச மாநிலம் ஹர்தோய் மாவட்டத்தில், வீட்டில் வைக்கப்பட்டிருந்த இருமல் மருந்தை அளவுக்கு அதிகமாகக் குடித்த 4 வயது சிறுமி அல்காபியா பரிதாபமாக உயிரிழந்த சம்பவம் பெரும் சோகத்தை ஏற்படுத்தியுள்ளது. தாடியா வான் பகுதியின் ஹர்ராய் கிராமத்தைச் சேர்ந்த அச்சிறுமி, தனது தாயாருடன் சாந்தி பகுதியில் உள்ள பிந்தாரி கிராமத்தில் இருக்கும் உறவினர் வீட்டிற்குச் சென்றிருந்தார். அங்கு கடந்த இரண்டு நாட்களாக இருமலால் அவதிப்பட்டு வந்த சிறுமி, அந்த வீட்டில் முதியவர் ஒருவருக்காக வைக்கப்பட்டிருந்த இருமல் மருந்து பாட்டிலை எடுத்து, யாருக்கும் தெரியாமல் முழுமையாகக் குடித்துள்ளார்.

மாலை வரை சாதாரணமாக இருந்த சிறுமியின் உடல்நிலை, இரவில் திடீரென மிகவும் மோசமடைந்தது. பதற்றமடைந்த குடும்பத்தினர் அவரைப் பல மருத்துவர்களிடம் காட்டிவிட்டு, இறுதியாக அரசு மருத்துவக் கல்லூரி மருத்துவமனைக்குக் கொண்டு சென்றனர்; ஆனால், அங்குச் சிறுமியைப் பரிசோதித்த மருத்துவர்கள் அவர் ஏற்கனவே இறந்துவிட்டதாக அறிவித்தனர். இருமல் மருந்தை அளவுக்கு அதிகமாக உட்கொண்டதால் சிறுமியின் இதயம் மற்றும் சுவாசக் கோளாறு ஏற்பட்டு இந்த மரணம் நிகழ்ந்துள்ளதாக அவசரச் சிகிச்சைப் பிரிவு மருத்துவர் அமித் ஆனந்த் தெரிவித்துள்ளார். பெற்றோரின் ஒரு சிறிய அலட்சியம் ஒரு குடும்பத்தின் விளக்கை அணைத்துள்ள நிலையில், மருந்துகளை எப்போதும் குழந்தைகளுக்கு எட்டாத தூரத்தில் வைக்க வேண்டும் என்று மருத்துவர்கள் எச்சரிக்கின்றனர்.