LATEST NEWS
பரபரப்பு திருப்பம்..! பண மோசடி வழக்கில் செந்தில் பாலாஜி எடுத்த புதிய அஸ்திரம் – நீதிமன்றம் பிறப்பித்த உத்தரவு..!!
போக்குவரத்துத் துறையில் வேலை வாங்கித் தருவதாகக் கூறி பணமோசடி செய்ததாகத் தொடரப்பட்ட வழக்கிலிருந்து தன்னை விடுவிக்கக் கோரி, செந்தில் பாலாஜி எம்பி, எம்எல்ஏ-க்கள் மீதான வழக்குகளை விசாரிக்கும் சிறப்பு நீதிமன்றத்தில் மனுத் தாக்கல் செய்துள்ளார். முன்னாள் அமைச்சரான இவர் மீது தொடரப்பட்ட இந்த வழக்கு, தமிழக அரசியல் வட்டாரத்தில் நீண்ட காலமாகப் பேசப்பட்டு வரும் முக்கிய வழக்காகும்.
இந்த மனுவை விசாரித்த சிறப்பு நீதிமன்ற நீதிபதி, செந்தில் பாலாஜியின் கோரிக்கை குறித்து பதிலளிக்குமாறு காவல்துறைக்கு உத்தரவிட்டுள்ளார். போக்குவரத்துத் துறையில் பணி நியமனம் வழங்குவதாகக் கூறிப் பலரிடம் பணம் பெற்று மோசடி செய்ததாக எழுந்த புகாரின் அடிப்படையில் இந்த வழக்குப் பதிவு செய்யப்பட்டது குறிப்பிடத்தக்கது.
தற்போது இந்த வழக்கிலிருந்து தன்னை விடுவிக்கக் கோரி செந்தில் பாலாஜி தாக்கல் செய்துள்ள மனு, சட்ட ரீதியாக அவர் எடுத்துள்ள புதிய ‘மூவ்’ ஆக இருக்குமோ என்ற கேள்வியை அரசியல் நோக்கர்கள் மத்தியில் எழுப்பியுள்ளது. காவல்துறையின் பதிலுக்குப் பிறகு இந்த மனு மீதான அடுத்தகட்ட விசாரணை நீதிமன்றத்தில் நடைபெறவுள்ளது.
