“கிழிந்த செருப்பைத் தைத்துப் போடும் 19 வயது ஊழியர்” Gen Z-வினர் சோம்பேறிகள் இல்லை… தனது நிறுவனப் பெண்ணின் கதையைக் கூறி விமர்சனங்களுக்கு முற்றுப்புள்ளி வைத்த ஸ்ரீதர் வேம்பு..!!

இன்றைய கார்ப்பரேட் உலகில் 1995 முதல் 2010-க்குள் பிறந்த ‘Gen Z’ தலைமுறையினர் உழைக்கத் தயங்குபவர்கள், தங்களுக்கு எல்லாம் தானாக கிடைக்க வேண்டும் என்று நினைப்பவர்கள் போன்ற எதிர்மறை விமர்சனங்களை அடிக்கடி எதிர்கொள்கின்றனர். ஆனால், வயது மற்றும் தலைமுறையை வைத்து மனிதர்களைப் பொதுப்படையாக மதிப்பிடுவதில் தமக்கு உடன்பாடில்லை என்று ஸ்ரீதர் வேம்பு தெரிவித்துள்ளார். அதற்குச் சான்றாக, தன் நிறுவனத்தில் பணிபுரியும் 19 வயது இளம் பெண் ஊழியர் ஒருவரின் வாழ்க்கைப் போராட்டத்தை அவர் முன்வைத்துள்ளார்.

அந்த 19 வயது பெண், தனது பெற்றோர் வாங்கிய கடன்களை அடைப்பதற்காகவும், தனது தம்பி, தங்கைகளின் படிப்பிற்கு ஆதரவாக இருப்பதற்காகவும் மட்டுமே கடினமாக உழைத்துப் பணம் சம்பாதிப்பதாக ஸ்ரீதர் வேம்புவிடம் கூறியுள்ளார். அவசியமற்ற ஆடம்பரங்களைத் தவிர்த்து, மிகக் குறைந்த விலையிலான ஆடைகளையே அவர் வாங்குகிறார். அதுமட்டுமின்றி, காலணிகள் உடைந்தால் கூடப் புதியதை வாங்காமல், அதைத் தையல் போட்டுப் பழுதுபார்த்துப் (mends her broken footwear) பயன்படுத்திப் பணத்தைச் சேமிக்கிறார். இந்த விவரங்களைக் கேட்ட ஸ்ரீதர் வேம்பு நெகிழ்ந்துபோய், அந்தப் பெண்ணின் பெற்றோரை நேரில் சந்தித்து, “இப்படிப்பட்ட மகளைப் பெற்றதற்கு நீங்கள் பெருமைப்பட வேண்டும்” என்று கூறப்போவதாகத் தெரிவித்துள்ளார்.

இந்த வைரல் பதிவின் மூலம், குடும்பப் பொறுப்பு, சிக்கனம், கடின உழைப்பு போன்ற உன்னதமான குணங்கள் எந்தவொரு குறிப்பிட்ட தலைமுறைக்கும் மட்டும் சொந்தமானவை அல்ல; அவை எக்காலத்திற்கும் பொதுவானவை என்பதை ஸ்ரீதர் வேம்பு சுட்டிக்காட்டியுள்ளார். மேலும், தனது அறிவுரையைக் கேட்டு, ஆடம்பரச் செலவுகளைத் தவிர்த்துத் தங்களது திருமணங்களை மிக எளிய முறையில் நடத்திக்கொண்ட 25 வயதுடைய இரண்டு இளம் ஊழியர்களைப் பற்றியும் அவர் குறிப்பிட்டுள்ளார். இத்தகைய எளிய மற்றும் ஒழுக்கமான வாழ்வியல் சிந்தனைகள் இன்றைய இளம் தலைமுறையினரிடமும் சமமாக நிறைந்துள்ளன என்பதை இந்த நிகழ்வு உறுதிப்படுத்துகிறது.