“2 உயிரும் போச்சு” காட்டுக்குள் கிடந்த கணவன் மனைவி சடலங்கள்.. தூக்கில் தொங்கவிட்டது யார்..? உறவினர்கள் பகீர் கொலைக் குற்றச்சாட்டு..!!

உத்தரப் பிரதேச மாநிலம் பிஜ்னார் மாவட்டத்தில், காட்டின் உட்பகுதியில் தேஷ்ராஜ் மற்றும் அவரது மனைவி சுஷ்மா ஆகியோரின் உடல்கள் மீட்கப்பட்ட சம்பவம் அப்பகுதியில் பெரும் அதிர்ச்சியை ஏற்படுத்தியுள்ளது. நேற்று காலை கால்நடைகளுக்குத் தீவனம் சேகரிப்பதற்காகத் தங்களது விளைநிலங்களுக்குச் சென்ற இந்தத் தம்பதியினர், இரவு நீண்ட நேரமாகியும் வீடு திரும்பாததால் உறவினர்கள் அவர்களைத் தீவிரமாகத் தேடி வந்த நிலையில் இந்தத் துயரச் சம்பவம் வெளிச்சத்திற்கு வந்துள்ளது.

கங்கை நதிக்கரையை ஒட்டிய புதர்களுக்கு இடையே மனைவி சுஷ்மாவின் உடல் கண்டெடுக்கப்பட்டதுடன், அவரது கழுத்தில் துப்பட்டா கட்டப்பட்டிருந்தது. அதே நேரத்தில், கணவர் தேஷ்ராஜின் உடல் அருகில் இருந்த மரத்தில் தொங்கிய நிலையில் மீட்கப்பட்டது. இந்த இரு உடல்களும் மீட்கப்பட்ட விதம் அப்பகுதியில் பெரும் பரபரப்பை ஏற்படுத்தியுள்ளது.

இந்த விசித்திரமான மற்றும் கொடூரமான மரணங்கள் தற்கொலை போல சித்தரிக்கப்பட்டிருந்தாலும், தங்களது குடும்பத்தினர் இருவரும் திட்டமிட்டுப் படுகொலை செய்யப்பட்டுள்ளதாகத் தேஷ்ராஜின் உறவினர்கள் குற்றம்சாட்டியுள்ளனர். இச்சம்பவம் குறித்து வழக்குப் பதிவு செய்துள்ள பிஜ்னார் மாவட்ட காவல்துறையினர், உடல்களைப் பிரேதப் பரிசோதனைக்கு அனுப்பி வைத்துவிட்டு பல்வேறு கோணங்களில் தீவிர விசாரணை மேற்கொண்டு வருகின்றனர்.