“துபாயிலிருந்து வந்த மிரட்டல் போன் கால்..!” 4 நாள் மாயமான கல்லூரி மாணவி தண்டவாளத்தில் சடலமாக மீட்பு.. மர்மத்தை நோக்கிய சிசிடிவி.. திடுக்கிடும் பின்னணி..!!

பீகார் மாநிலம் பாட்னாவில் உள்ள கும்ஹ்ரார் பகுதி ரயில்வே தண்டவாளத்தில், கடந்த நான்கு நாட்களாகக் காணாமல் போயிருந்த கல்லூரி மாணவி மற்றும் அடையாளம் தெரியாத வாலிபர் ஒருவர் சடலமாக மீட்கப்பட்ட கொடூரச் சம்பவம் அப்பகுதியில் பெரும் பரபரப்பை ஏற்படுத்தியுள்ளது. கண்டெடுக்கப்பட்ட இளம் பெண், டி.பி.எஸ் கல்லூரியின் பட்டதாரி மாணவியான ஷைலி ராணி என அடையாளம் காணப்பட்டுள்ளார், ஆனால் அவருடன் சடலமாகக் கிடந்த இளைஞர் யார் என்ற விபரம் இன்னும் தெரியவில்லை. கடந்த அக்டோபர் 5-ஆம் தேதி என்.ஐ.டிதேர்வுக்கான விண்ணப்பத்தைப் பூர்த்தி செய்வதாகக் கூறி வீட்டிலிருந்து புறப்பட்ட ஷைலி ராணி, அதன் பிறகு வீடு திரும்பாததால் கங்கர்பாக் காவல் நிலையத்தில் அவரது குடும்பத்தினர் ஏற்கனவே காணாமல் போனதாகப் புகார் அளித்திருந்தனர்.

இந்த விவகாரத்தில், ஷைலி ராணி காணாமல் போன பிறகு அவரது குடும்பத்தினருக்குத் துபாயிலிருந்து வந்த ஒரு மர்மத் தொலைபேசி அழைப்பு இந்த வழக்கின் தீவிரத்தன்மையை அதிரடியாக அதிகரித்துள்ளது. ஷைலியின் உறவினரான மனோஜ் குமார் அளித்துள்ள விபரங்களின்படி, துபாயிலிருந்து பேசிய நபர் ஒருவர், ஷைலி தன்னிடம் ரூ.10,000 ஆன்லைன் கடன் வாங்கியிருப்பதாகவும், அந்தத் தொகையை உடனடியாகத் திருப்பிச் செலுத்தத் தவறினால் கடுமையான சட்ட நடவடிக்கை எடுக்கப்படும் என்றும் மிரட்டியுள்ளார். பணத்தைச் செலுத்திவிடலாம் எனப் பதிலளித்தும் ஷைலி வீடு திரும்பாத நிலையில், தற்போது அவரது உடல் தண்டவாளத்தில் மீட்கப்பட்டுள்ளதால், ஆன்லைன் கடன் மிரட்டல் கும்பல் இந்த விபரீதத்திற்குப் பின்னால் இருக்கலாம் என்ற சந்தேகம் வலுத்துள்ளது.

ஷைலி ராணியின் தந்தை சஞ்சீவ் குமார் பிரஜாபதி, இது தற்கொலை அல்ல என்றும், தனது மகளை யாரோ திட்டமிட்டுக் கொலை செய்துவிட்டு உடலைத் தண்டவாளத்தில் வீசியுள்ளனர் என்றும் காவல்துறையின் மீது கடுமையான குற்றச்சாட்டுகளை முன்வைத்துள்ளார். நான்கு நாட்களாகத் தேடியும் காவல்துறையினரால் தனது மகளைக் கண்டுபிடிக்க முடியவில்லை என அவர் தனது துயரத்தை வெளிப்படுத்தியுள்ளார். ராஜேந்திரநகர் முனைய ரயில் நிலைய GRP காவல்துறையினர் இரு சடலங்களையும் கைப்பற்றிப் பிரேதப் பரிசோதனைக்குஅனுப்பியுள்ளனர்; மேலும், அப்பகுதியில் உள்ள சிசிடிவி காட்சிகள், மாணவியின் கைபேசி அழைப்பு விவரங்கள் மற்றும் தண்டவாளத்தில் கிடந்த அந்த மர்ம இளைஞரின் அடையாளம் ஆகியவற்றைக் கொண்டு காதல் விவகாரம் மற்றும் கடன் மிரட்டல் உள்ளிட்ட பல்வேறு கோணங்களில் தீவிர விசாரணை நடத்தி வருகின்றன