“அடக்கடவுளே…! பள்ளி முடிந்து கணவருடன் கிளம்பிய ஆசிரியை…” ஒரே நொடியில் தலைகீழாக மாறிய குடும்பத்தின் நிலை.. நெஞ்சை பிழியும் சோகம்..!!

ஒரு சில நொடிகளில் நடக்கும் சாலை விபத்து, ஒரு குடும்பத்தின் பல ஆண்டுகால வாழ்க்கையை தலைகீழாக மாற்றிவிடும். உத்தரப் பிரதேசத்தின் கிரேட்டர் நொய்டாவில் உள்ள இட்டேரா பகுதியில் மனைவியுடன் ஸ்கூட்டரில் வீட்டுக்குத் திரும்பிக் கொண்டிருந்த 40 வயது நபர், தார் வாகனம் மோதியதில் பரிதாபமாக உயிரிழந்தார். உயிரிழந்தவர் சிபியானா பகுதியைச் சேர்ந்த நீரஜ் என்றும், அவர் உச்சநீதிமன்றத்தில் வழக்கறிஞராகப் பணியாற்றி வந்தவர் என்றும் தெரியவந்துள்ளது. பள்ளி ஆசிரியரான தனது மனைவியை பள்ளி முடிந்ததும் ஸ்கூட்டரில் அழைத்துக்கொண்டு வழக்கம்போல் வீட்டை நோக்கிச் சென்றபோது, வேகமாக வந்த தார் வாகனம் மோதியதில் இருவரும் தூக்கி வீசப்பட்டனர். மருத்துவமனைக்குக் கொண்டு செல்லப்பட்ட நீரஜைப் பரிசோதித்த மருத்துவர்கள் அவர் ஏற்கனவே உயிரிழந்துவிட்டதாகத் தெரிவித்தனர்.

விபத்தில் படுகாயமடைந்த நீரஜின் மனைவியின் நிலைமை மிகவும் கவலைக்கிடமாக உள்ளது. அவரது உடலில் 18 இடங்களில் எலும்பு முறிவு ஏற்பட்டுள்ளதாகவும், குறிப்பாக இடுப்பு பகுதியில் பலத்த காயம் அடைந்து தற்போது கோமா நிலையில் இருப்பதாகவும் குடும்பத்தினர் தெரிவித்துள்ளனர். மேலும், உடலின் ஒரு பக்கம் செயலிழந்துள்ளதால் அவருக்குப் பல அறுவை சிகிச்சைகள் மேற்கொள்ளப்பட்டு வருகின்றன. ஒருபுறம் கணவரை இழந்த துயரம், மறுபுறம் உயிருக்கு போராடும் மனைவியின் தீவிர சிகிச்சைக்கு ஏற்கனவே பல லட்சம் ரூபாய் செலவாகி உள்ள சூழல் என குடும்பத்தினர் மிகப்பெரிய பொருளாதார மற்றும் மன ரீதியான நெருக்கடியை எதிர்கொண்டு வருகின்றனர்.

விபத்தை ஏற்படுத்திய தார் வாகனத்தைச் சம்பவ இடத்திலேயே விட்டுவிட்டு ஓட்டுநர் தப்பிச் சென்றுவிட்டார். வாகனத்தைக் கைப்பற்றிய போலீசார், கண்காணிப்பு கேமரா காட்சிகளையும் வாகனப் பதிவெண்ணையும் வைத்து விசாரணையை தீவிரப்படுத்தியுள்ளனர். தார் வாகனம் தவறான பாதையில் அதிவேகமாக வந்ததாகவும், அதில் பயணித்த நான்கு பேர் மது அருந்தியிருந்ததாகச் சம்பவத்தை நேரில் பார்த்தவர்கள் கூறியதாகவும் நீரஜின் குடும்பத்தினர் குற்றஞ்சாட்டியுள்ளனர். இந்தச் சோகமான சம்பவம், சாலையில் வாகனம் ஓட்டும்போது வேகக் கட்டுப்பாடும் கவனமும் எவ்வளவு அவசியம் என்பதை மீண்டும் உணர்த்தும் வேதனையான நிகழ்வாக மாறியுள்ளது.