“உள்ளே என்ன இருந்தா எங்களுக்கு என்ன..?”ஆசீர்வாத் மாவு பாக்கெட்டை பிரித்ததும் காத்திருந்த அதிர்ச்சி.. டெலிவரி பாய் கொடுத்த அலட்சியப் பதில்.. சமூக வலைதளங்களில் வெடித்த சர்ச்சை..!!

பிரபல ஆன்லைன் மளிகைப் பொருட்கள் விநியோக தளமான பிளிங்கிட் மூலம் வாடிக்கையாளர் ஒருவர் ஆர்டர் செய்த ஆசீர்வாத் கோதுமை மாவு பாக்கெட்டில் குறைபாடு இருந்ததாகச் சமூக ஊடகங்களில் புகார் எழுந்துள்ளது. அந்தப் பொருளுக்காக ரூ.273 மற்றும் கொண்டு வரப்பட்ட பைக்கான கட்டணத்தையும் பிளிங்கிட் நிறுவனம் வசூலித்துள்ளது. ஆனால், மாவு விநியோகிக்கப்பட்ட போது அதன் பேக்கேஜிங் தரம் மற்றும் மாவுப் பொருட்களில் குறைபாடுகள் இருப்பதை வாடிக்கையாளர் கவனித்துள்ளார். இதுகுறித்து டெலிவரி செய்ய வந்த நபரிடம் கேட்டபோது, “உள்ளே என்ன இருக்கிறது என்று எங்களுக்கு எப்படித் தெரியும்?” என அவர் அலட்சியமாகப் பதிலளித்துள்ளார்.

இதனைத் தொடர்ந்து, பாதிக்கப்பட்ட நபர் பிளிங்கிட் செயலி மற்றும் சமூக ஊடகத் தளம் மூலமாகத் தனது புகாரைப் பதிவு செய்துள்ளார். அண்மைக்காலமாக பிளிங்கிட் போன்ற விரைவு வர்த்தகத் தளங்களில் விநியோகிக்கப்படும் உணவுப் பொருட்களின் தரம் மற்றும் பேக்கேஜிங் குறித்துப் பல்வேறு புகார்கள் தொடர்ந்து எழுந்து வரும் நிலையில், இச்சம்பவம் நுகர்வோரிடையே மீண்டும் விவாதப் பொருளாக மாறியுள்ளது. இது போன்ற விரைவு விநியோகச் சேவைகளைப் பயன்படுத்தும் போது, பொதுமக்கள் காலாவதி தேதி மற்றும் பேக்கிங் தரம் ஆகியவற்றைச் சரிபார்த்துக் கொள்ள வேண்டும் என்று சமூக ஆர்வலர்கள் எச்சரிக்கின்றனர்.