“முதல்வர் விஜய் சொன்னது பொய்..” ஜெம் வீரமணி தவெக அமைச்சரின் குடும்ப நண்பர்.. மதுராந்தகத்தில் குண்டை தூக்கிப்போட்ட எடப்பாடி பழனிசாமி.. தமிழக அரசியலில் திடீர் பரபரப்பு..!!

மதுராந்தகத்தில் இன்று செய்தியாளர்களைச் சந்தித்த அதிமுக பொதுச் செயலாளர் எடப்பாடி பழனிசாமி, போக்சோ வழக்கில் கைதாகியுள்ள ஜெம் கிரானைட் வீரமணி விவகாரத்தில் தவெக அரசை மிகக் கடுமையாக விமர்சித்துக் குற்றச்சாட்டுகளை முன்வைத்துள்ளார். திமுக ஆட்சிக்காலத்தில் பதிவு செய்யப்பட்ட இந்த வழக்கில் போதிய ஆதாரங்கள் இல்லை என நீதிமன்றத்தில் கூறப்பட்டபோது நீதிபதி அதை ஏற்க மறுத்ததைச் சுட்டிக்காட்டிய அவர், ஆட்சி மாற்றத்திற்குப் பிறகும் கடந்த 3 மாதங்களாக தவெக அரசு இந்த வழக்கை திட்டமிட்டு இழுத்தடித்து வந்ததாகக் குற்றம்சாட்டினார். மேலும், ஜூன், ஆகஸ்ட் மாதங்களில் நடந்த வழக்கு விசாரணைகளின் போது இறுதி அறிக்கை தாக்கல் செய்யாமல் அரசுத் தரப்பில் மீண்டும் மீண்டும் வாய்தா வாங்கப்பட்டதாகவும், இதனால் கோபமடைந்த நீதிபதியின் அதிரடி உத்தரவின் பேரில் மட்டுமே வீரமணி கைது செய்யப்பட்டாரே தவிர, முதலமைச்சர் விஜய்யின் நடவடிக்கையால் அல்ல என்றும் எடப்பாடி பழனிசாமி தெளிவுபடுத்தினார்.

தேர்தல் பிரசாரத்தில் விஜய் கூறிய கூற்றுக்கள் அனைத்தும் அரசியல் ஆதாயத்திற்கான அப்பட்டமான பொய் என்று சாடிய இபிஎஸ், போக்சோ குற்றச்சாட்டுக்கு உள்ளான ஜெம் வீரமணிக்கு தவெக அரசே முழுமையாக உடந்தையாக செயல்பட்டுள்ளது என்பதற்குப் பல ஆதாரங்கள் இருப்பதாகக் கூறினார். வீரமணி பங்கேற்ற ஒரு முக்கிய நிகழ்ச்சியில் தமிழ்நாடு அரசின் வணிகவரித்துறை மற்றும் உணவுத்துறை அமைச்சர்கள் கலந்துகொண்டதையும், அதில் வணிகவரித்துறை அமைச்சர் வீரமணியைத் தனது “குடும்ப நண்பர்” என்று பகிரங்கமாகப் குறிப்பிட்டதையும் அவர் ஆதாரமாக எடுத்துக் காட்டினார். திரைப்படங்களில் நடித்து வந்த விஜய் தற்போது நிஜ வாழ்க்கையிலும் தனது நடிப்பைத் தொடர்ந்து கொண்டிருக்கிறார் என்று விமர்சித்த எடப்பாடி பழனிசாமி, தவெக ஆட்சிப் பொறுப்பேற்ற குறுகிய காலத்திற்குள் மாநிலத்தில் சட்டம் ஒழுங்கு சீர்குலைந்து, குற்றவாளிகள் எந்தவித அச்சமும் இன்றி சுதந்திரமாக நடமாடும் சூழல் உருவாகியுள்ளதாகக் கூறி தனது கண்டனத்தைப் பதிவு செய்தார்.