“இது என்ன கொடுமை.. லிஃப்ட்டுக்குள்ள போகக் கூடாதா…?” ஆசிரியை மீது நாய் வளர்க்கும் பெண் கொடூர தாக்குதல்… பதற வைக்கும் காட்சி..!!

உத்தரப் பிரதேச மாநிலம் காசியாபாத், ராஜ்நகர் எக்ஸ்டென்ஷனில் உள்ள ‘விண்ட்சர் பாரடைஸ்’ குடியிருப்பில் லிஃப்ட்டில் நாயைக் கூட்டிச் செல்வது தொடர்பாக மீண்டும் ஒரு மோதல் சம்பவம் நடந்துள்ளது. இந்தச் சம்பவத்தில், இந்திராபுரத்தில் உள்ள பிரபல பள்ளியில் ஆசிரியையாகப் பணியாற்றி வரும் ஹீனா பாரி என்பவர் தாக்கப்பட்டதாகக் குற்றம் சாட்டப்பட்டுள்ளது. செப்டம்பர் 12-ஆம் தேதி பிற்பகல் சுமார் 3 மணி அளவில் பள்ளி முடிந்து வீட்டிற்குத் திரும்பிய ஹீனா பாரி குடியிருப்பின் லிஃப்ட்டிற்கு வந்தபோது, அதே அமைப்பில் வசிக்கும் ஷ்வேதா சுபே என்ற பெண் தனது செல்லப் பிராணியான நாயுடன் ஏற்கனவே லிஃப்ட்டுக்குள் இருந்துள்ளார். அவர் மற்ற எவரையும் லிஃப்ட்டிற்குள் நுழைய அனுமதிக்காததால் இந்த பிரச்சனை தொடங்கியுள்ளது.

ஆசிரியை ஹீனா பாரி அதற்கு எதிர்ப்பு தெரிவித்து லிஃப்ட்டிற்குள் செல்ல முயன்றபோது இருவருக்கும் இடையே வாக்குவாதம் ஏற்பட்டுள்ளது. அப்போது வாக்குவாதம் முற்றி, ஷ்வேதா சுபே தான் வைத்திருந்த நாயைக் கட்டுப்படுத்தும் தடியால் ஆசிரியரைத் தாக்கியுள்ளார். மேலும் ஆசிரியரைக் கன்னத்தில் அறைந்து, கெட்ட வார்த்தைகளால் திட்டி கொலை மிரட்டலும் விடுத்துள்ளார். அங்கு பணியில் இருந்த பாதுகாப்பு ஊழியர் (செக்யூரிட்டி கார்டு) அவர்களைத் தடுக்க முயன்றும், அந்த நாய் வளர்ப்புப் பெண் யாருடைய பேச்சையும் கேட்காமல் தொடர் மோதலில் ஈடுபட்டுள்ளார். இச்சம்பவம் முழுவதும் அங்குள்ள கேமராவில் பதிவாகி இணையத்தில் வைரலாகி வருகிறது.

இச்சம்பவம் குறித்துப் பாதிக்கப்பட்ட ஆசிரியை ஹீனா பாரி நந்திகிராம் காவல் நிலையத்தில் புகார் அளித்துள்ளார். தனது புகாரில் தாக்குதல் நடத்திய பெண் மீது கடுமையான நடவடிக்கை எடுக்க வேண்டும் என்றும், குடியிருப்புகளில் லிஃப்ட் விதிமுறைகளைச் சரியாக நடைமுறைப்படுத்த வேண்டும் என்றும் வலியுறுத்தியுள்ளார். இப்புகாரின் பேரில் நந்திகிராம் காவல் துறையினர் சம்பவ இடத்தில் இருந்த சிசிடிவி காட்சிகளை ஆய்வு செய்து விசாரணையைத் தீவிரப்படுத்தியுள்ளனர்.