“ரூ.25 கோடி கொடுத்து வேட்பாளரை வாங்கினார்” எடப்பாடி பழனிசாமியின் துரோக வரலாறு இதுதான்… அமைச்சர் அருண்ராஜ் பகீர்..!!

திருப்பூர் மாவட்டம் தாராபுரத்தில் செய்தியாளர்களைச் சந்தித்த அமைச்சர் அருண்ராஜ், அதிமுக பொதுச்செயலாளர் எடப்பாடி பழனிசாமி மீது கடுமையான மற்றும் பரபரப்பான அரசியல் குற்றச்சாட்டுகளை முன்வைத்துள்ளார். தேர்தல் முடிந்து நம்பிக்கை வாக்கெடுப்பு நடைபெற்ற சமயத்தில், அதிமுகவைச் சேர்ந்த 25 எம்.எல்.ஏ.க்கள் தவெகவுக்கு ஆதரவாக வாக்களித்ததாக அவர் குறிப்பிட்டுள்ளார்.

அதிமுகவில் தற்போது எவ்வித ஒருங்கிணைப்பும் இல்லை என்றும், திமுக மற்றும் அதிமுக ஆகிய இரு கட்சிகளும் கள்ளக்கூட்டணி அமைத்து எம்.எல்.ஏ.க்களை விலைக்கு வாங்க முற்பட்டதாகவும் அவர் சாடியுள்ளார். மேலும், எடப்பாடி பழனிசாமி மீண்டும் ஆட்சி அமைப்பதற்காகப் பல கோடி ரூபாயைத் தயாராக வைத்திருந்ததுடன், தவெக எம்.எல்.ஏ.க்களையும் விலைக்கு வாங்க முயற்சி செய்தார் என்று பகிரங்கமாகக் குற்றம் சாட்டியுள்ளார்.

அதோடு நிறுத்தாமல், எடப்பாடி பழனிசாமி தனது சொந்தத் தொகுதியிலேயே 25 கோடி ரூபாய் கொடுத்து தவெக வேட்பாளரை விலைக்கு வாங்கியுள்ளதாக அமைச்சர் அருண்ராஜ் தெரிவித்துள்ளார். ஒருவேளை தவெக வேட்பாளர் அங்குத் தொடர்ந்து போட்டியிட்டிருந்தால், எடப்பாடி பழனிசாமி டெபாசிட் கூட வாங்கியிருக்க மாட்டார் என்றும், இதுதான் அவரது துரோக வரலாறு என்றும் அவர் மிக ஆவேசமாகப் பேசியுள்ளார்.