“என்ன கொடுமை சார் இது… பர்கர் சாப்பிடப் போன இடத்தில் பகீர்..! மெக்டொனால்ட்ஸ் டேபிளில் எலிகள் அட்டகாசம்.. வைரலாகும் ஷாக்கிங் வீடியோ..!!”

குஜராத் மாநிலம் ராஜ்கோட்டில் உள்ள மெக்டொனால்ட்ஸ் உணவகத்தில் மேஜைகள் மற்றும் நாற்காலிகள் மீது இரண்டு எலிகள் ஓடித்திரியும் வீடியோ இணையத்தில் வெளியாகி பெரும் பரபரப்பை ஏற்படுத்தியுள்ளது. வாடிக்கையாளர் ஒருவரால் எடுக்கப்பட்ட இந்த வீடியோ சமூக வலைதளங்களில் வேகமாகப் பரவியதை அடுத்து, உணவுப் பாதுகாப்பு மற்றும் பூச்சித் தடுப்பு நடவடிக்கைகள் குறித்துப் பலரும் கேள்விகளை எழுப்பினர். இதையடுத்து ராஜ்கோட் மாநகராட்சியின் உணவுப் பாதுகாப்புத் துறை அதிகாரிகள் அந்த உணவகத்திற்கு நேரில் சென்று ஆய்வு நடத்தினர்.

இந்தச் சம்பவம் குறித்துப் பேசிய மாநகராட்சி சுகாதார அதிகாரி ஜெயேஷ் வகானி, கிரீன்லேண்ட் சவுக்கில் உள்ள மெக்டொனால்ட்ஸ் கிளைக்குள் எலிகள் இருந்தது உறுதி செய்யப்பட்டுள்ளதாகத் தெரிவித்தார். “மெக்டொனால்ட்ஸ் உணவகத்தில் கண்ணாடியால் பிரிக்கப்பட்ட இரண்டு பகுதிகள் உள்ளன; ஒன்று வாடிக்கையாளர்கள் சாப்பிடும் இடம், மற்றொன்று பார்ட்டி கொண்டாட்டங்களுக்கான இடம். ஆய்வு செய்ததில், எலிகள் வெளிப்பகுதியிலிருந்து பார்ட்டி கொண்டாடும் பகுதிக்குள் நுழைந்தது கண்டறியப்பட்டது” என்று அவர் கூறினார். உணவகத்திற்குள் பெரிய அளவில் சுகாதாரக் குறைபாடுகள் எதுவும் இல்லையென்றாலும், பூச்சித் தடுப்பு நிர்வாகத்தில் கவனம் செலுத்தாத காரணத்தால் அந்த உணவகத்திற்கு நிர்வாகக் கட்டணமாக ரூ.3,000 அபராதம் விதிக்கப்பட்டது.

‘ஹார்ட் கேஸ்டில் ரெஸ்டாரன்ட் பிரைவேட் லிமிடெட்’ நிறுவனத்தால் நடத்தப்படும் இந்த உணவகத்தில் ஆய்வு மேற்கொண்ட அதிகாரிகள், உணவுப் பாதுகாப்புச் சட்ட விதிகளின்படி அங்கிருந்த ‘டோன்ட் பாக்கெட் பால்’ மற்றும் ‘ஸ்ட்ராபெர்ரி ஃபுரூட் கிரஷ்’ ஆகியவற்றின் மாதிரிகளைச் சேகரித்து ஆய்வகப் பரிசோதனைக்கு அனுப்பி வைத்தனர். ராஜ்கோட் மாநகராட்சி நகரம் முழுவதும் மேற்கொண்ட உணவுப் பாதுகாப்புத் தணிக்கையின் ஒரு பகுதியாகவே இந்த ஆய்வு நடத்தப்பட்டது. இந்தத் தீவிரச் சோதனையின் போது உணவகங்கள், விடுதிகள் மற்றும் உணவுக் கூடங்கள் உட்பட 53 இடங்கள் ஆய்வு செய்யப்பட்டு, கெட்டுப்போன 65 கிலோ உணவுப் பொருட்கள் அழிக்கப்பட்டன. மேலும் 18 உணவகங்களுக்கு எச்சரிக்கை நோட்டீஸ் அனுப்பப்பட்டு, மொத்தமாக ரூ.17,000 அபராதம் வசூலிக்கப்பட்டது.